Испания чемпионатининг ўнинчи туридан ўрин олган навбатдаги “Эл-Класико” нафақат майдондаги кураш, балки турли таҳлиллар билан ҳам ёдда қолди. Унда “Реал Мадрид” каталониялик рақибини 2:1 ҳисобида мағлуб этган бўлса, жамоанинг собиқ афсонавий футболчиси Тони Кроос бу ўйинда “Барселона” сафида айнан қайси ўйинчи етишмаганини таъкидлаб ўтди.
“Барселона” учун энг муҳим шахс Иньиго Мартинес эди, — деди Кроос. — Мен буни аввал ҳам айтганман. У ҳимоядан чиқишни жуда чиройли ташкил этадиган, биринчи пасни тўғри берадиган футболчи эди. Ҳимоячи сифатида у жамоага тинчлик ва мувозанат бахш этарди. Тўғри, унда тезлик етишмасди, лекин техник жиҳатдан у ажойиб ўйинчи бўлган. “Эл-Класико”да эса айнан унинг йўқлиги катта бўшлиқ яратди”.
Германиялик футболчига кўра, “Барселона”нинг марказий ҳимояси “Реал”нинг юқори прессингига чидай олмади ва айнан шунда Мартинеснинг ўрни яққол сезилди. “Каталонияликлар мана шу босим остида жуда қийналди, чунки ҳимоя орқали чиройли ўйин бошлаш имконияти қолмади. Иньиго Мартинеснинг паслари рақибнинг прессингини бузишга қодир эди. Ҳозир эса улар унинг ўрнини боса оладиган футболчи топа олишмаган,” — деди Кроос.
Маълумки, Иньиго Мартинес “Барселона” билан чемпионлик мавсумини якунлагандан сўнг Саудия Арабистонининг “Ан-Наср” клубига кўчиб ўтган эди. Унинг жамоадан кетиши “Барселона”нинг ҳимоя чизиғида маълум даражадаги бўшлиқни келтириб чиқарганини кўплаб экспертлар ҳам таъкидлаб келмоқда.
“Реал Мадрид” эса бу ғалаба билан мусобақа жадвалида пешқадамлик мавқеини янада мустаҳкамлади. Тони Крооснинг сўзларига кўра, “Эл-Класико”даги ҳар бир кичик тактик детал ҳам натижага таъсир қилади ва бу сафар “Барселона”нинг айнан бир тажрибали ҳимоячига муҳтож бўлгани яққол кўринди.
Кўплаб испан нашрлари ҳам Кроос фикрига қўшилиб, “Барселона”нинг ҳимоядаги ноаниқ ҳаракатлари жамоага қарши ишлаганини ёзмоқда. Эҳтимол, клуб қишки трансфер ойнасида айнан шу нуқтани мустаҳкамлашни биринчи вазифа сифатида белгилаши мумкин.
“Zamin”ни Telegram'да ўқинг!
