Россиянинг бир қатор ҳудудларида бензин нархи кескин ошмоқда, деб хабар берди [56orb.ru].
Оренбург вилоятида ёнилғи қуйиш шохобчаларида нархлар ҳар ҳафтада деярли ўзгариб, айрим ҳолларда юқори суръатда ўсмоқда. Расмий маълумотларга кўра, 20 октябрь ҳолатига АI-95 туридаги бензиннинг бир литри 64,15 рублга етган — бу бир ҳафтада 30 копейкага кўп. Шунингдек, АI-98 тури 84,47 рублгача қимматлаган.
Мутахассислар бу тенденцияни бир нечта омиллар билан изоҳлашмоқда. Биринчи сабаб — нефтни қайта ишлаш заводларидаги техник носозликлар туфайли ишлаб чиқариш ҳажмининг қисқариши. Январь–август ойларида заводларда режали ва режадан ташқари тўхташлар оқибатида бензин ишлаб чиқариш 123,6 минг тоннага нисбатан 102,2 минг тоннага тушган.
Иккинчи омил — логистика муаммолари. Темирйўл ҳаракатидаги танқислик ва ташиш тартибидаги ўзгаришлар сабаб, айниқса Узоқ Шарққа ёнилғи етказиб бериш сезиларли даражада камайган.
Бундай вазият талаб ва нархга таъсир кўрсатмоқда. Кўпгина фуқаролар пулни тежаш мақсадида бензинни канистрларга литрлаб олишга ўтгани ортидан сунъий талаб юзага келгани таъкидланмоқда.
Бундан ташқари, кузги қишлоқ хўжалиги ишлари ва иситиш мавсуми бошланиши ҳам бозордаги босимни оширган. Биржада эса августдан бери бензин нархи 12 фоизга қимматлаган.
Айрим ёнилғи шохобчалари нархларни барқарор ушлаб туролмаётгани боис фаолиятини тўхтатган — июлдан сентябргача уларнинг сони 2,6 фоизга қисқарган.
Мутахассислар фикрича, Россия Хитой, Сингапур ва Жанубий Кореядан ёнилғи импортига божларни бекор қилиш орқали вазиятни енгиллатиши мумкин. Бироқ, нефть заводлари ва логистика тизимини модернизация қилмасдан, бундай инқирозлар келгусида яна такрорланиши эҳтимолдан холи эмас.
“Zamin”ни Telegram'да ўқинг!
