Кембриж университети қошидаги Сейнсбери лабораторияси олимлари Шотландияда 407 миллион йил аввал яшаган замбуруғ қолдиғини топишди, деб ёзди New Phytologist.
Топилма Уинфилд сланец тош қатламларидан аниқланган бўлиб, у замбуруғлар ва ўсимликлар ўртасидаги илк биологик ҳамкорлик — микориза мавжудлигини тасдиқлади. Бу ўзаро фойдали иттифоқда замбуруғлар ўсимликларга сув ва минерал моддаларни ўзлаштиришда ёрдам берса, ўсимликлар эса уларга шакар моддаларини тақдим этган. Микориза бугунги кўплаб экотизимлар учун асосий биологик тизим ҳисобланади.
Янги тур Rugososporomyces lavoisierae деб номланди. У қадимги Aglaophyton ўсимлиги билан симбиотик муносабатда бўлган ва мазкур ўсимликка боғлиқ иккинчи замбуруғ тури сифатида қайд этилди.
Олимлар қотиб қолган тўқималарни замонавий микроскопия орқали ўрганиб, замбуруғ ва ўсимлик ҳужайраларини аниқ ажрата олди. Улар ҳатто ДНК сақланмаганига қарамасдан, оптик излар орқали замбуруғ мавжудлигини исботлади.
Тадқиқот раҳбари, доктор Кристин Струллу-Дерриен таъкидлашича, замбуруғнинг тармоқли тузилиши унинг паразит эмас, балки ўсимлик билан ҳамкорликда яшаганини кўрсатган.
“Бу кашфиёт Ердаги ҳаёт шаклланишида замбуруғлар ва ўсимликлар қандай қилиб биргаликда қуриқ муҳитга мослашганини ва илк экотизимларни яратганини англашда муҳим аҳамиятга эга,” — дейди у.
Меҳмон гуруҳидаги фойдаланувчилар ушбу мақолага изоҳ қолдира олмайди.
