Тошкентнинг "Малика" электроника бозорида ҳаво тозалагичлар ва уй учун намлагичларнинг нархи сезиларли даражада ошди. Сотувчилар бу ҳолатни улгуржи нархларнинг кўтарилиши билан изоҳлашмоқда.
Божхона тўловлари бекор қилинганига қарамай, кутилган нарх пасайиши ҳали кузатилмаган. Пойтахтдаги ҳаво сифати ёмонлашгани туфайли бу маҳсулотларга талаб ортиб, нарх босимига сабаб бўлмоқда.
"Малика" бозоридаги сотувчилар деярли барча ҳаво тозалагич моделлари нархи 50 АҚШ долларига ошганини маълум қилишди. Нархлар турли тоифалардаги маҳсулотлар учун бир хил даражада кўтарилган.
Уй намлагичлари ҳам қимматлашган. Кичик хоналар ёки автомобиллар учун мос бўлган ихчам моделларнинг нархи 60-70 минг сўмдан бошланмоқда.
Катта хоналар учун мўлжалланган намлагичларнинг нархи эса 10-25 АҚШ долларигача ошган. Сотувчилар бу ҳолатни етказиб берувчилардан харид қилинаётган маҳсулотларнинг нархи ошгани ва харидорлар қизиқиши юқорилиги билан боғлашмоқда.
Шунингдек, божхона тўловлари бекор қилинганига қарамай, бу ҳали чакана нархларга таъсир кўрсатмаган. Сотувчиларнинг айтишича, божхона тўловидан озод қилинган янги партиялар ҳали бозорда пайдо бўлмади.
Ўзбекистонда айрим техника воситалари учун импорт божхона тўловлари бекор қилинган. Аввал 20 фоизлик божхона тўлови ёки ҳар бир маҳсулот учун камида 3 АҚШ доллари миқдорида тўлов қўлланиларди.
Бу қарор истеъмолчига тақдим қилинадиган техникалар нархини пасайтириши кутилган эди. Аммо мутахассисларнинг таъкидлашича, бу ҳолат дарҳол арзонлашувни кафолатламайди, чунки етказиб берувчи компаниялар ҳали эски божхона қоидалари асосида олиб келинган маҳсулотларни сотмоқда.
Тошкентда ҳаво сифати муаммоси 3-ноябрда иситиш мавсумининг бошланиши билан кескинлашди. Ўша куннинг ўзида Ўзбекистон пойтахти дунёнинг энг чанли ҳавога эга шаҳарлар учлигига кирди.
Ноябр ўрталарига келиб ҳаво сифати янада ёмонлашди ва ҳозиргача бу ҳолат давом этмоқда. Ҳаво сифати ёмонлашгани Тошкентда ҳаво тозалагичлар ва намлагичларга бўлган талабни кучайтирди.
Шунингдек, ҳимоя ниқобларига талаб ошиб, дорихоналарда улар етишмовчилиги кузатилмоқда. Респиратор ниқобларни топиш қийин, оддий тиббий ниқоблар эса майда чангни ушлай олмайди.
Шаҳар аҳолиси уй шароитида чангни камайтиришнинг турли усулларини изламоқда, бу эса ҳаво тозалагичлар ва иқлим техникасига бўлган талабни янада оширмоқда. “Zamin”ни Telegram'да ўқинг!
Ctrl
Enter
Хато топдингизми?
Иборани ажратиб Ctrl+Enter тугмасини босинг Мавзуга оид янгиликлар
Маълумот
Меҳмон гуруҳидаги фойдаланувчилар ушбу мақолага изоҳ қолдира олмайди.
Меҳмон гуруҳидаги фойдаланувчилар ушбу мақолага изоҳ қолдира олмайди.
