Toshkentda havo tozalagichlari narxi oshdi

Toshkentning "Malika" elektronika bozorida havo tozalagichlar va uy uchun namlagichlarning narxi sezilarli darajada oshdi. Sotuvchilar bu holatni ulgurji narxlarning ko'tarilishi bilan izohlashmoqda.

Bojxona to'lovlari bekor qilinganiga qaramay, kutilgan narx pasayishi hali kuzatilmagan. Poytaxtdagi havo sifati yomonlashgani tufayli bu mahsulotlarga talab ortib, narx bosimiga sabab bo'lmoqda.

"Malika" bozoridagi sotuvchilar deyarli barcha havo tozalagich modellari narxi 50 AQSh dollariga oshganini ma'lum qilishdi. Narxlar turli toifalardagi mahsulotlar uchun bir xil darajada ko'tarilgan.

Uy namlagichlari ham qimmatlashgan. Kichik xonalar yoki avtomobillar uchun mos bo'lgan ixcham modellarning narxi 60-70 ming so‘mdan boshlanmoqda.

Katta xonalar uchun mo‘ljallangan namlagichlarning narxi esa 10-25 AQSh dollarigacha oshgan. Sotuvchilar bu holatni yetkazib beruvchilardan xarid qilinayotgan mahsulotlarning narxi oshgani va xaridorlar qiziqishi yuqoriligi bilan bog'lashmoqda.

Shuningdek, bojxona to‘lovlari bekor qilinganiga qaramay, bu hali chakana narxlarga ta’sir ko‘rsatmagan. Sotuvchilarning aytishicha, bojxona to‘lovidan ozod qilingan yangi partiyalar hali bozorda paydo bo‘lmadi.

O‘zbekistonda ayrim texnika vositalari uchun import bojxona to‘lovlari bekor qilingan. Avval 20 foizlik bojxona to‘lovi yoki har bir mahsulot uchun kamida 3 AQSh dollari miqdorida to‘lov qo‘llanilardi.

Bu qaror iste'molchiga taqdim qilinadigan texnikalar narxini pasaytirishi kutilgan edi. Ammo mutaxassislarning ta'kidlashicha, bu holat darhol arzonlashuvni kafolatlamaydi, chunki yetkazib beruvchi kompaniyalar hali eski bojxona qoidalari asosida olib kelingan mahsulotlarni sotmoqda.

Toshkentda havo sifati muammosi 3-noyabrda isitish mavsumining boshlanishi bilan keskinlashdi. O‘sha kunning o‘zida O‘zbekiston poytaxti dunyoning eng changli havoga ega shaharlar uchligiga kirdi.

Noyabr o‘rtalariga kelib havo sifati yanada yomonlashdi va hozirgacha bu holat davom etmoqda. Havo sifati yomonlashgani Toshkentda havo tozalagichlar va namlagichlarga bo‘lgan talabni kuchaytirdi.

Shuningdek, himoya niqoblariga talab oshib, dorixonalarda ular yetishmovchiligi kuzatilmoqda. Respirator niqoblarni topish qiyin, oddiy tibbiy niqoblar esa mayda changni ushlay olmaydi.

Shahar aholisi uy sharoitida changni kamaytirishning turli usullarini izlamoqda, bu esa havo tozalagichlar va iqlim texnikasiga bo‘lgan talabni yanada oshirmoqda. “Zamin”ni Telegramʻda oʻqing!