Венесуэла президенти Николас Мадуронинг Америка ҳарбийлари томонидан кутилмаганда қўлга олиниши Каракасда катта сиёсий бўшлиқни юзага келтирди. Гарчи расман раҳбарлик жиловлари вице-президент Делси Родригес қўлига ўтган бўлса-да, амалда мамлакат тақдирини «чавезм» мактабининг икки қудратли ва хавфли арбоби белгиламоқда.
Соядаги икки гигант: Падрино ва Кабелио
The Washington Post нашрининг таҳлилига кўра, айни дамда Венесуэлада қарорларни қабул қилувчи асосий кучлар мудофаа вазири Владимир Падрино Лопес ва ички ишлар вазири Диосдадо Кабелиодир. Улар нафақат қуролли кучларни, балки мамлакат иқтисодиётининг энг даромадли тармоқларини ҳам назорат қилишади.
Владимир Падрино: Армия ва иқтисодиёт «хўжайини»
2014 йилдан буён мудофаа вазири курсисини эгаллаб келаётган Падрино амалда ҳокимиятнинг алоҳида тармоғини яратган.
Назорат: Армиядан ташқари, йирик конлар, портлар ва асосий истеъмол товарларини тақсимлаш тизими унинг изнида.
Айблов: АҚШ расмийлари уни гиёҳванд моддалар савдосида айблаб, боши учун 15 миллион доллар мукофот эълон қилган.
Диосдадо Кабелио: «Инқилоб болғаси»
Ички ишлар вазири Кабелио режимнинг энг радикаль ва шафқатсиз вакили ҳисобланади.
Қуролли гуруҳлар: У нафақат полицияни, балки мотоциклларда юрувчи ниқобли «колективос» жангариларини ҳам бошқаради.
Услуби: Унинг «Болға билан ур» кўрсатуви ва «Шубҳаланиш – хиёнат» деган шиори мамлакатдаги қўрқув муҳитини ифодалайди. Унинг боши учун АҚШ 25 миллион доллар тикиб қўйган.
Расмий ва амалий ҳокимият тақсимоти
Гарчи президентлик курсисида Делси Родригес ўтирган ва унинг акаси Хорхе Родригес парламентни бошқараётган бўлса-да, куч ишлатар тузилмаларсиз уларнинг ҳукми кесилган. Экспертлар фикрича, ҳозирги вазиятда вазифалар қуйидагича тақсимланган: «Делси бошқаради, Диосдадо эса тартиб ўрнатади».
Бандитми ёки фанатик?
Вашингтон экспертлари ушбу икки фигура билан музокара қилиш имкониятларини турлича баҳоламоқда:
Падрино (Ҳарбий бизнесмен): Мутахассислар фикрича, «бандит билан келишиш осонроқ». Падрино ўз манфаатлари ва хавфсизлиги эвазига АҚШ билан муайян битимларга келишиши мумкин.
Кабелио (Мафкуравий фанатик): У билан келишувга эришиш деярли имконсиз деб кўрилади. Унинг оилавий клани разведка ва солиқ тизимигача кириб борган бўлиб, у ҳокимиятни охиригача ҳимоя қилишга тайёр.
Мадуро ағдарилгач, Каракас кўчаларида «колективос» гуруҳлари блокпостлар ўрнатиб, аҳолини қаттиқ назоратга олди. Бу эса янги раҳбариятнинг мамлакатни темир интизом билан бошқариш ниятидан далолат беради.
Сизнингча, Венесуэланинг янги раҳбарияти АҚШ билан тил топиша оладими ёки ички низолар фуқаролар урушига айланиб кетадими?
“Zamin”ни Telegram'да ўқинг!
