Сиддиков қамауға алынды: "Узбекнефтегаз" компаниясында миллиардтаған қаражатты талан-таражға салу
"Узбекнефтгаз" АҚ басқармасының бұрынғы төрағасы Баходир Сиддиков қамауға алынды. Kun.uz дереккөзінің айтуынша, ол мемлекеттік қаражатты талан-таражға салу және басқа да сыбайлас жемқорлық әрекеттері бойынша күдікке ілінген.
Бүгін, 27 январьда президент төрағалығымен өткен жиында "Узбекнефтгаз" жүйесінде ауқымды тексеру жұмыстары жүргізіліп жатқаны айтылды. Мәлім етілгендей, тексеру барысында миллиардтаған сумға тең қаражаттың жоғалғаны, ірі көлемдегі ұрлық фактілері анықталды.
Жиналыста МҚҚ төрағасына "Узбекнефтгаз" АҚ бойынша жауапты қызметкерлердің жауапкершілігін қарау міндеті қойылғаны да айтылды. Яғни мәселе бір-екі адаммен ғана шектелмей, бүкіл жүйедегі жауапкершілік тізбегіне дейін жетуі мүмкін.
Естеріңізге сала кетейік, өткен жылдың декабрь айының ортасынан бастап энергетика саласындағы кадрлар бойынша да күрт өзгерістер байқалды. Алдымен Өзбекстан президентінің энергетикалық қауіпсіздік жөніндегі өкілі Алишер Султанов, содан кейін "Узбекнефтгаз" басшысы Баходир Сиддиков қызметінен босатылды.
Ақпарат үшін, Әлішер Сұлтанов 2013-2015 жылдары "Узбекнефтгаз" төрағасының орынбасары, 2015-2018 жылдары серіктестік төрағасы болып жұмыс істеген. 2017 жылдан бастап премьер-министрдің орынбасары ретінде геология, отын-энергетика кешені, химия, мұнай-химия және металлургия өнеркәсібі салаларын басқарған. 2019-2022 жылдары энергетика министрі болған, кейін президенттің кеңесшісі қызметіне ауысқан.
Баходир Сиддиков 2019-2020 жылдары да "Узбекнефтгаз" компаниясын басқарған, 2023 жылы бұл қызметке қайта тағайындалған. 2025 жылдың декабрінде отставкаға шыққан кезде "басқа жұмысқа ауысатыны" айтылған еді.
Ал қазір тексеру нәтижелері мен тергеу әрекеттері аясында бұл іс саланың ғана емес, қоғамның да назарында болуы заңды. Өйткені әңгіме қарапайым сандарда емес - бұл мемлекеттік қаражат, сенім мен жауапкершілік туралы.
“Zamin”-ді Telegram-нан оқыңыз!
