Наманган облысында адамгершілік пен ерліктің үлгісі болған оқиға орын алды. Төтенше жағдайлар қызметінің қызметкері ағынмен ағып бара жатқан кішкентай баланы құтқарып қалды.
Мәлім болғандай, 26 сәуір күні Жаңа Наманган ауданындағы «Миңтерек» махалласы аумағынан өтетін Үлкен Наманган каналына 3 жасар бала түсіп кетіп, ағынмен аға жөнелген.
Дәл осы уақытта Давлатабад аудандық ТЖБ қызметкері Улуғбек Асқаров қызметтен қайтып бара жатқан болатын. Ол кездейсоқ баланың қауіпті жағдайда екенін байқап қалып, қас қағым сәтте әрекетке көшкен.
Құтқарушы еш ойланбастан суға секіріп түсіп, батып бара жатқан баланы алып шықты және оның өмірін сақтап қалды. Айта кетейік, балаға шұғыл көмек көрсетілді және қазіргі уақытта оның жағдайы жақсы.
Бұл құтқару процесі жергілікті тұрғындардың үйіне орнатылған бақылау камерасына да түсіп қалған.
Аталған жағдай құтқарушылардың кез келген жағдайда дайын әрі жанқияр екенін тағы бір мәрте дәлелдеді.
