Барселона қорғаушысы жарақат алып ауруханаға жіберілді

«Барселонаның» қорғаушысы Эрик Гарсия Чемпиондар лигасындағы «Брюгге» командасына қарсы ойынның соңғы минуттарында жарақат алды. 24 жастағы футболшы 93-минутта ауыстырылды.

Алғашқы мәліметтерге қарағанда, оның мұрны сынған. Barca Universal хабарлауынша, испаниялық футболшы кездесу соңында ауруханаға жеткізілген, бірақ ол алдымен журналистермен сөйлесуге үлгерген.

«Иә, меніңше, мұрным сынған сияқты. Көреміз, үміттенемін, бұл аса күрделі мәселе емес», – деді Гарсия сұхбатында.

«Барселона» командасы 9-қараша, жексенбі күні Ла Лига аясында «Сельта» командасына қарсы ойнайды. Ал Чемпиондар лигасындағы келесі ойында «көк-анар түстілер» 25-қараша күні Англияда «Челси»-ге қарсы кездеседі.