Луис де ла Фуэнте Ямалдың сөзіне жауап берді

Испания құрамасының бас бапкері Луис де ла Фуэнте "Барселонаның" вингері Ламин Ямалдың мадридтік "Реал" клубы туралы даулы мәлімдемелеріне қатысты пікір білдірді. Қазан айындағы "Эль-Класико" матчы қарсаңында 18 жастағы футболшы "Реалды" алаяқтық және үнемі шағымдану әдеті үшін айыптаған болатын.

"Мен үшін құрмет түсінігі талқыланбайды. Сөздерге сақ болу қажет, өйткені кейде оларды контекстен шығарып алуға болады.

Біреуді ренжіту өте оңай, бірақ бұл әрқашан құрметсіздік дегенді білдірмейді. Менің толық сенімім бар, Ламиннің жаман ниеті болмаған, ол ешкімді қорлағысы келмеген", – деді де ла Фуэнте баспасөз мәслихатында.

Ламин Ямал денсаулығына байланысты мәселелер себебінен Испания құрамасының қараша айындағы жиынына қатыспайды.