Лапорта: Камп Ноудағы атмосфера ерекше

«Барселона» президенті Жоан Лапорта жаңартылған «Камп Ноу» стадионындағы алғашқы ойыннан кейінгі пікірлерімен бөлісті. Каталония клубы өз алаңына қайта оралуын «Атлетик Бильбао»-ны 4:0 есебімен ірі жеңіспен атап өтті.

«Монжуик» стадионы бізді уақытша құтқарды, бірақ «Камп Ноу»-дағы ахуал мүлдем басқа. Бұл нағыз футбол стадионы, жанкүйерлер алаңның дәл жанында орналасқан.

Құрылыс барысында ең күрделі кезең аяқталды, енді қалған жұмыстарды әлдеқайда тезірек іске асыру көзделіп отыр. Біздің мақсатымыз – процесті 2026 жылға дейін аяқтау», – деді Лапорта The Touchline басылымына берген сұхбатында.

«Барселонаның» келесі үйдегі кездесуі 29 қараша күні «Алавеске» қарсы өтеді. Алайда бұған дейін Ханс-Дитер Фликтің командасы Чемпиондар лигасы аясында Лондонда «Челсиге» қарсы ойнайды.