"The Touchline" хабарлауынша, "Ливерпуль" басшылығы бас бапкер Арне Слоттың клубтағы болашағына қатысты нақты талаптар қойған. Дереккөзге сенсек, мерсисайдтықтар маманнан командада қалу мүмкіндігін сақтап қалу үшін бір уақытта бірнеше маңызды тапсырманы орындауды күтіп отыр.
Ең басты шарт - маусымды кем дегенде бір жүлдемен аяқтау. "Қызылдар" үшін биыл "құрғақ қалу" нұсқа емес. Сондықтан Слоттың алдына Англия Кубогы мен Чемпиондар Лигасында максималды нәтиже көрсету міндеті қойылғаны айтылуда. Яғни, команда бұл жарыстарға тек қатысушы болып қана қоймай, нағыз үміткер ретінде күресуі керек.
Бірақ мәселе тек кубоктарда ғана емес. АПЛ да "Ливерпуль" үшін өте маңызды майдан болып тұр. Себебі қарапайым: келесі маусымда Чемпиондар лигасына шығу - клубтың беделі мен экономикалық тұрақтылығы үшін шешуші фактор. Чемпиондар лигасынсыз қалу қаржылық шығындарға, трансфер жоспарларының бұзылуына және жалпы жобаның баяулауына әкелуі мүмкін.
Сондықтан Слот пен оның командасы маусымды үздік төрттікте аяқтауы керек. Қазір "Ливерпуль" турнир кестесінде 4-орыннан 3 ұпай артта қалып отыр - яғни жағдай "қолда," бірақ қателесуге орын аз.
Қысқасы, Слот үшін маусымның екінші бөлігі "сынақ режимінде" өтуде:
жүлде - керек, төрттік - шарт, Еуропаға жол - міндетті. Енді бәрі алаңда шешіледі: нәтиже болса - сенім артады, болмаса - сұрақтар көбейетіні анық.
“Zamin”-ді Telegram-нан оқыңыз!
