Роналду араб кубогына қатысты пікір білдірді: «Қабылдау — ізгілік»

Криштиану Роналду өз жанкүйерлер парақшасында Араб чемпиондар кубогы туралы жарияланған постқа пікір қалдырды. Бұл турнир мен ондағы голдер төңірегіндегі талқылаулар қайтадан жанданды.

cr7historical атты фан-аккаунт «Аль-Наср» клубының 2023 жылы жеңіске жеткен Араб чемпиондар кубогын ресми турнир ретінде бағалап, Роналдудың бұл жарыста салған голдері оның жалпы статистикасынан шығарылмауы тиіс екенін атап өтті.

Сондай-ақ постта: «ФИФА басынан бастап бұл кубокты ресми турнир ретінде таныған. Демек, бұл жарыстағы титул да, Роналдудың голдері де оның кәсіби мансабының статистикасына қосылады. Оның 967 голының бірде-бірі жойылмайды», — деп жазылған.

Роналду бұл талқылауға қысқа әрі нақты жауап беріп, постқа «Қабылдау — ізгілік» деп пікір қалдырды.

Анықтама үшін, Араб чемпиондар кубогы тұрақты түрде өткізілмейтін, көбіне халықаралық достық турнир мәртебесіндегі жарыс ретінде бағаланады.