Англия Премьер-лигасы әлемдегі ең бай футбол лигасы саналып келгенімен, Испанияның қос алыбы ауқымы жағынан барлық бәсекелестерін артта қалдыруда. «Реал Мадрид» пен «Барселона» 2024/25 жылғы маусымда табысы 1 миллиард доллардан асқан жалғыз футбол клубтары ретінде тіркелді. Мадридтіктер 1,3 миллиард доллар, ал каталониялықтар 1,1 миллиард доллар табыс табуға қол жеткізді.
Әлемдік спорт ауқымында мұндай жоғары қаржылық көрсеткіштерге тек АҚШ-тың «Даллас Ковбойз» (1,25 млрд доллар) және «Лос-Анджелес Доджерс» (1,1 млрд доллар) командалары ғана шыға алды. Ал футбол әлемінде испандық грандтар қаржылық тұрақтылық бойынша абсолютті көшбасшылықты сақтап тұр.
2026 жылғы болжамдарға сәйкес, әлемдегі ең қымбат футбол клубтарының рейтингін 7,7 миллиард доллар құнымен «Реал Мадрид» бастап тұр. Екінші орынға 6,65 миллиард доллармен «Барселона» жайғасса, үздік үштікті Англияның «Манчестер Юнайтед» клубы (6,47 млрд доллар) түйіндеді.
Үздік ондыққа сондай-ақ «Бавария» (5,78 млрд), «Ливерпуль» (5,74 млрд), «Ман Сити» (5,7 млрд), «Арсенал» (5,43 млрд), «ПСЖ» (5 млрд), «Челси» (4 млрд) және «Тоттенхэм» (3,5 млрд) клубтары енді. Тізімнің алты сатысын Англия клубтары иеленгеніне қарамастан, ең жоғары қаржылық құн әлі де Испания өкілдерінің қолында қалып отыр.
