Әлемге әйгілі чип өндіруші Nvidia компаниясы жасанды интеллект агенттеріне арналған жаңа ашық бастапқы кодты платформаны ұсынуға дайындалуда. NemoClaw деп аталатын бұл жоба корпоративтік клиенттерге өз жұмыс процестерін автоматтандыруға және әртүрлі тапсырмаларды орындайтын ақылды агенттерді басқаруға мүмкіндік береді. Сарапшылардың айтуынша, бұл платформа Nvidia чиптерін пайдаланбайтын компаниялар үшін де ашық болады. Мұндай wired.com хабарлайды.
Компания бұл жаңалықты Сан-Хоседе өтетін жыл сайынғы әзірлеушілер конференциясы қарсаңында жариялауды жоспарлап отыр. Қазіргі уақытта Nvidia Google, Adobe, Cisco және Salesforce сияқты ірі технологиялық алпауыттармен серіктестік орнату бойынша келіссөздер жүргізуде. Платформаның ашық бастапқы кодты болуы серіктестерге жобаға үлес қосу арқылы бастапқы кезеңде тегін пайдалануға мүмкіндік береді.
Жаңа жүйенің басты артықшылығы – оның корпоративтік ортада қауіпсіздік пен құпиялылықты қамтамасыз ететін арнайы құралдармен жабдықталуы. Бұл әсіресе автономды жұмыс істейтін және пайдаланушының бақылауынсыз тапсырмаларды орындайтын "claw" типті агенттердің қауіпсіздігін арттыруда маңызды рөл атқарады. Бұған дейін Meta сияқты компаниялар қызметкерлерге мұндай агенттерді пайдалануға тыйым салған болатын, өйткені олар кейде күтпеген қателіктер жіберуі мүмкін.
Nvidia бұл қадам арқылы өзінің бағдарламалық қамтамасыз ету стратегиясын кеңейтуде. Компания осы уақытқа дейін негізінен CUDA жүйесіне сүйеніп келсе, енді ашық бастапқы шешімдер арқылы жасанды интеллект инфрақұрылымындағы өз үстемдігін сақтап қалуды мақсат етіп отыр. Сондай-ақ, жақын күндері Nvidia тарапынан жаңа инференция чиптері жүйесі де таныстырылады деп күтілуде.
“Zamin”-ді Telegram-нан оқыңыз!
