Қытай Meta корпорациясының 2 миллиард долларлық келісімшартына тыйым салды

Қытайдың даму және реформалар жөніндегі ұлттық комиссиясы Meta корпорациясының Manus жасанды интеллект стартапын сатып алуына кедергі келтірді. Құны 2 миллиард долларға бағаланған бұл келісімді тоқтату бойынша қос тарапқа ресми талап жіберілді.

Бұл туралы Ixbt.com хабарлайды.

Реттеуші өз шешімін технологиялар экспортына бақылау орнату қажеттілігімен түсіндірді.

Manus стартапы қазіргі уақытта Сингапурда тіркелгенімен, ол бастапқыда Қытайда құрылып, дамыған. Ел заңнамасына сәйкес, қытайлық негізін қалаушылары бар компаниялар жасап шығарған технологияларды шетелге сату Бейжіңнің келісімін талап етеді.

Бұған дейін осындай механизм TikTok желісіне қатысты да қолданылған болатын.

Meta өкілдері келісімнің қолданыстағы заңдарға толық сәйкес келетінін және жағдай диалог арқылы шешілетініне сенім білдірді. Алайда наурыз айында Manus негізін қалаушылардың Қытайдан шығуына шектеу қойылғаны белгілі болды.

Қазіргі уақытта стартап Meta инфрақұрылымына интеграцияланғандықтан, келісімнің күшін жою техникалық тұрғыдан күрделі процесс болып саналады.

Manus жобасы пайдаланушының тұрақты сұрауларынсыз көп сатылы тапсырмаларды өз бетінше орындай алатын автономды агент ретінде танымал. Бұл тыйым АҚШ пен Қытай арасындағы жасанды интеллект саласындағы бәсекелестік күшейген тұста орын алды.

Өткен аптада Ақ үй шетелдік әзірлемелерге қарсы тұру үшін жергілікті компаниялармен ынтымақтастықты күшейтетінін жариялаған болатын.