Күз-қыс маусымына дайындық аясында Қазақстан бойынша шамамен 9,8 мың көп қабатты үй күрделі жөндеуден өтті. Бұл үрдісте ғимараттардың шатырлары мен қасбеттері жаңартылды, ішкі инженерлік жүйелер модернизацияланды, жертөлелер мен кіреберістер ретке келтірілді.
Бағдарлама аясында 244 миллиард теңге қаржы бөлінген. Қауіпсіздік пен қолайлылықты арттыру мақсатында қосымша 1,5 мың кодтық құлыптар орнатылған металл есіктер қойылды, 14,6 мың шаршы метр шыны пакеттер мен 70 мыңға жуық энергия үнемдейтін жарықтандыру жабдықтары орнатылды.
Сонымен қатар, лифт шаруашылығын жаңғырту жұмыстары жүргізілуде: жоспарланған 500-ден астам лифттің 300-і орнатылып, қалғандарын ауыстыру жұмыстары жалғасуда. Тұрғын пәтерлерде энергия тиімділігін арттыру мақсатында күн панельдері мен коллекторлар орнатыла бастады.
Пәтерлерде жылуды жақсырақ сақтау үшін 195 мың шаршы метр қасбет базальт материалымен қапталды. Осы шаралар арқылы 20 миллион киловатт электр энергиясы және 2,8 миллион текше метр табиғи газ үнемделеді деп күтілуде.
Бұған дейін Құрылыс және тұрғын үй-коммуналдық шаруашылық министрлігінің баспасөз қызметі көп қабатты үйлер тұрғындарына кіреберістерді тазалау басқарушы компания қызметкерлерінің міндетіне кірмейтінін түсіндірген еді.
