Ташкент қалалық әкімдігі Абдулла Қадири көшесіндегі жасыл аймақтың жағдайына байланысты тұрғындардың алаңдаушылықтарына ресми жауап берді. Әкімдік баспасөз қызметінің мәлімдеуінше, аталған көшеде жүргізіліп жатқан жұмыстар қалалықтар үшін қолайлы және экологиялық орта құруға, сондай-ақ аумақты кешенді абаттандыруға бағытталған.
Атап айтқанда, жаяу жүргіншілер жолақтарын қалпына келтіру, топырақты тегістеу, көгалдандыру және суару жүйесін жаңарту жоспарланған. Барлық жұмыстар Ташкент қалалық абаттандыру басқармасы тарапынан дендролог және эколог мамандардың бақылауымен жүзеге асырылуда.
Мамандардың түсіндіруінше, ағаш діңдерінің төменгі бөлігін уақытша топырақпен жабу – абаттандыру жұмыстары алдында маңызды технологиялық кезең болып есептеледі. Бұл әдіс топырақты нығыздау үшін қажет және өңдеу процесінің соңғы кезеңіне дайындықты қамтамасыз етеді.
Дендрологтардың айтуынша, бұл уақытша жабын ағаштар үшін қауіп тудырмайды. Себебі бұл процесте тамыр жүйесіне ауа жеткізілуі қамтамасыз етіледі.
Мамандардың айтуынша, Өзбекстанның құрғақ континенттік климаты жағдайында артық ылғалдың әсерінен тамырлардың шіру қаупі жоқ. Барлық құрылыс және жер жұмыстары аяқталғаннан кейін, көктем маусымы басталғанға дейін ағаш түбінен топырақ алынып, тамырлардың толық ауа алмасуы мен табиғи ылғалдануы агротехникалық талаптарға сәйкес қамтамасыз етіледі.
Әкімдік сондай-ақ елорданың жасыл аймақтарын сақтау мәселесіне белсенді азаматтық ұстаным мен назар аударғаны үшін тұрғындар мен бұқаралық ақпарат құралдарына алғыс білдірді. Мұндай белсенділік Ташкентті қолайлы, жасыл әрі ашық қала ретінде дамытуға қызмет ететіні атап өтілді.
