23:36 / 28.11.2025

Өзбекстанда жергілікті жүрдек пойыздар шығарылады

Өзбекстан таяу жылдары өзінің алғашқы жергілікті жүрдек пойыздарын шығара бастайды деп күтілуде. Бұл туралы "Узбекистон темир йуллари" АҚ төрағасының бірінші орынбасары Хикматулла Рахматов мәлімдеді.

27 ноябрьде Ташкентте өткен Транскаспий дәлізі және өзара тәуелділік бойынша ірі форум аясында Рахматов журналистерге теміржол желісіндегі стратегиялық жоспарлар туралы айтып берді.

Оның айтуынша, шетелдік серіктестермен жергілікті зауытта жүрдек пойыздар шығару бойынша келіссөздер аяқталды. "Шешім жақын күндері шығады. Біз бұл пойыздарды әлемнің жетекші елдерінің бірінің компаниясымен бірлесіп Өзбекстанда шығаруды мақсат етіп отырмыз. Өндірісті 2027 жылы бастаймыз," - деді ол.

Рахматовтың айтуынша, Өзбекстанда шығарылатын жаңа жүрдек пойыздар импортталғандарға қарағанда әлдеқайда арзанға түседі. Мұның бірнеше себебі бар: жергілікті мамандардың жоғары біліктілігі, технологияларды игеру мүмкіндігі және салық түсімдерінің ел ішінде қалуы.

"Біздің теміржол мамандары шынымен де әлемдік деңгейде. Неліктен біз пойыз жасамауымыз керек? Процесс басталса, кадрларымыз жаңа білім алып, инновацияға ұмтылады. Кейіннен бұл пойыздарды тек Өзбекстанға ғана емес, Орталық Азия, Кавказ және ТМД елдеріне экспорттауды жоспарлап отырмыз. Өйткені біздің өнім халықаралық стандарттарға сәйкес келеді," - деді Рахматов.

Оның айтуынша, Өзбекстан шығарғысы келетін дәрежедегі жүрдек пойыздар әзірге ТМД-да тек Ресейде ғана бар, бірақ олар да көзделген заманауи сұраныс деңгейінде емес. Жергілікті өндіріс есебінен пойыздардың бағасы шетелден сатып алудан кем дегенде 10-15 пайызға арзан болады.

Сондай-ақ кәсіпорындарда жұмыс орындары ашылып, экспорт есебінен валюта түсімдері артады. Әзірге жылдық қуат ретінде 10 жүрдек пойыз шығару көзделген.