2025 жылы Өзбекстанда электр энергиясын өндіру 6%-ға артты. Энергетика министрлігінің мәліметінше, күн және жел электр станциялары өндірген энергия көлемі екі есеге өсіп, алғаш рет 10,5 млрд кВт·сағаттан асты. Бұл туралы podrobno.uz хабарладыхабарберді.
Қайта жаңартылатын көздер есебінен «жасыл» генерация, гидроэнергетиканы қоса алғанда, 16,8 млрд кВт·сағатқа жетті. Бұл көрсеткіш өткен кезеңмен салыстырғанда 29%-ға жоғары. Нәтижесінде ел 3,2 млрд текше метр газды үнемдеді, ал зиянды заттар шығарындылары 4,7 млн тоннаға азайды.
Жыл ішінде жалпы қуаты 4 647 МВт болатын 42 жаңа жоба іске қосылды. Олардың қатарында 5 күн, 4 жел станциясы, 10 аккумуляторлық жүйе, 1 жылу электр станциясы және 2 когенерация қондырғысы бар.
Сонымен қатар, жалпы 3 508 МВт қуатты қамтитын 21 жобада құрылыс жұмыстары жалғасуда. Жоспарларға электр станциялары мен энергия сақтау жүйелерімен бірге қосалқы станциялар, сондай-ақ 2 050 километр жаңа электр желілерін салу да енгізілген.
Магистральдық және тарату желілерінің мыңдаған километрі күрделі жөндеуден өтті, трансформаторлар мен қосалқы станциялар жаңартылды. Бұл 954 махаллада 800 мыңнан астам үй шаруашылығының электрмен қамтылуын жақсартуға қызмет еткені атап өтілді.
Энергия үнемдеу бағдарламасы аясында 2,7 млрд кВт·сағат электр және 2 млрд текше метр газ үнемделгені хабарланды.
Бұған дейін Жаңа Ташкент аумағында қытайлық серіктестермен Өзбекстандағы алғашқы жабық типтегі қосалқы станция салынып жатқаны хабарланған еді. Ол заманауи тригенерация технологиясы негізінде жұмыс істеп, қаланы бір мезгілде жылыту, салқындату және энергия үнемдеуді қамтамасыз ететіні айтылған.
“Zamin”-ді Telegram-нан оқыңыз!
