Калифорния университети олимлари томонидан ўтказилган кенг кўламли тадқиқотлар натижасида сунъий интеллект (SI) одамларни алдаш қобилиятига эга бўлгани аниқланди. Хусусан, GPT-4.5 модели Тюринг тестида иштирок этган 73 фоиз инсонни унинг ҳақиқий одам эканига ишонтиришга муваффақ бўлди.
Тадқиқот қандай ўтказилди?
Тадқиқот Сан-Диего шаҳрида амалга оширилди. Унда тўртта сунъий интеллект тизими (LLaMa-3.1−405B, GPT-4o, GPT-4.5 ва ELIZA) ҳамда 284 киши иштирок этди. Иштирокчиларга беш дақиқалик мулоқотдан сўнг икки суҳбатдошдан қайси бири бот эканини аниқлаш вазифаси берилди.
Тест натижалари қуйидагича бўлди:
- GPT-4.5 – 73% иштирокчини унинг ҳақиқий одам эканига ишонтирди.
- LLaMA-3.1 – 56% ҳолатда муваффақият қозонди.
- GPT-4o – 21% ҳолатда одамлар томонидан инсон сифатида қабул қилинди.
- ELIZA – 23% иштирокчини алдашга муваффақ бўлди.
GPT-4.5 нинг муваффақияти сирлари
Олимларнинг фикрига кўра, GPT-4.5 модели энг юқори натижани персоналлаштириш орқали қўлга киритган. СИ ўзини ёш интроверт, интернет маданияти ва жаргонидан хабардор шахс сифатида намоён қилганида, одамлар унга кўпроқ ишонишган. Агар бу мослашув жараёни амалга оширилмаса, унинг муваффақият даражаси атиги 36% га тушган.
Тадқиқот хулосалари ва эҳтимолий хавфлар
Мутахассислар бундай натижалар маълум ижтимоий хавфларга олиб келиши мумкинлигини таъкидлашмоқда. Сунъий интеллект аллақачон одамлар билан ёзишмаларни олиб бориш қобилиятига эга бўлиб, бу мижозларни қўллаб-қувватлаш хизматлари, ижтимоий тармоқлар ва онлайн мулоқот платформаларида кенг қўлланилиши мумкин.
Шунингдек, романтик чат-ботлар, сохта дўстлар ва автоматлаштирилган троллинг тизимлари реал ҳаётда пайдо бўлаётгани ҳам кузатилмоқда. Бироқ, бу борада ижобий имкониятлар ҳам мавжуд — мулоқот талаб қиладиган касбларни автоматлаштириш учун янги йўллар очилмоқда.
Тюринг тестидан ўтиш — «ақллилик»нинг белгисими?
Айни пайтгача бирор бир СИ тизими уч томонлама классик Тюринг тестидан барқарор ўта олмаган — бу тестда СИ инсон билан тўғридан-тўғри баҳслашиши керак бўлади. Бироқ, GPT-4.5 буни уддалаган биринчи сунъий интеллект бўлди. Шу билан бирга, олимлар бундай муваффақият СИ «ақлли» бўлиб қолганини англатмаслигини таъкидлашмоқда. Тюринг тестидан муваффақиятли ўтиш сунъий интеллектнинг ақлий қобилиятини эмас, балки одамларни тақлид қилишдаги муваффақиятини кўрсатади.
Тадқиқот натижаларига кўра, келажакда SI нинг инсонлар ҳаётига таъсири янада ортиб бориши мумкин. Бу эса унинг қўлланилиши ва назорати юзасидан янги қоидалар ва қонунларни ишлаб чиқиш зарурлигини кўрсатади.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
