АҚШлик 14 ёшли гений юрак касалликларини аниқлайдиган илова яратди

Америка Қўшма Штатларининг Техас штати, Даллас шаҳрида яшовчи 14 ёшли ўқувчи бутун дунё врачларини ҳайратга солди. Унинг номини эслаб қолинг — Сиддхартх Нандяла. Бу ёш ихтирочи юрак уриши орқали инсонда юрак-қон томир касалликлари бор-йўқлигини аниқлай оладиган сунъий интеллект дастурини яратди!

7 сонияда юрак диагностикаси — фантастика эмас, реал ҳаёт

Сиддхартх яратган Circadian AI деб номланган мобил илова оддий смартфон микрофони орқали юрак уриши товушини ёзиб олади ва атиги етти сония ичида таҳлил қилиб, ташхис қўяди. Илованинг аниқлик даражаси — 96 фоиз, бу жуда юқори кўрсаткич!

Дастур аллақачон синовдан ўтган

Ушбу сунъий интеллект асосидаги илова АҚШда 15 мингдан ортиқ беморда ва Ҳиндистонда 700 нафар беморда синаб кўрилди. Хусусан, Ҳиндистоннинг Гунтур шаҳридаги давлат шифохонасида ўтказилган амалиёт самарадорликни тўлиқ тасдиқлади.

Глобал эътироф ва мақсад

Сиддхартх ўз ихтиросини Ҳайдарободда бўлиб ўтган Сунъий интеллект саммитида тақдим этди ва иловани аввало тиббий хизматдан чекланган ҳудудларда фойдаланиш учун яратганини таъкидлади.

— «Кўпчиликда тезкор ташхисга имконият бўлмайди. Агар биз юрак касаллигини эрта аниқласак, инсон ҳаётини сақлаб қолишимиз мумкин», — дейди ёш ихтирочи.

Катталар ҳам ҳавас қилади

Сиддхартх Нандяла ҳозирда Oracle ва ARM компаниялари томонидан сертификатланган энг ёш сунъий интеллект мутахассиси ҳисобланади. Қизиғи шундаки, у аллақачон ўрта мактабни якунлаб, Даллас университетида компютер фанлари бўйича таҳсил олмоқда.

Ҳиндистон бош вазиридан қўллаб-қувватлаш

Андҳра-Прадеш штати бош вазири ёш ихтирочи билан шахсан учрашиб, унинг салоҳиятини эътироф этди ва келгусидаги илмий ишларини қўллаб-қувватлашини маълум қилди.

Zamin.uz таҳлили:
Сиддхартх Нандяла — бугунги кундаги технология ва илмнинг қудратини намоён қилувчи ёш йўлбошчи. Унинг юрак соғлиғини аниқлашга қаратилган илова нафақат тиббий инқилоб, балки бутун дунёдаги миллионлаб инсонлар ҳаётини сақлаб қолишга хизмат қилади. “Замин” янгиликларини “Telegram”да кузатиб боринг