Google янги кодининг 75 фоизини сунъий интеллект ёзмоқда
Google компанияси янги дастурий кодларнинг 75 фоизини сунъий интеллект ёрдамида яратаётганини маълум қилди. Генерация қилинган кодлар муҳандислар томонидан текширилади ва бу технология иш жараёнларини, хусусан код миграциясини олти баробар тезлаштиришга хизмат қилмоқда. Компания раҳбари Сундар Пичаининг таъкидлашича, сунъий интеллект ва мутахассислар ҳамкорлиги самарадорликни оширишда асосий омилга айланди. Шунингдек, Microsoft ва Meta каби бошқа технологик гигантлар ҳам яқин йилларда код ёзиш жараёнининг катта қисмини сунъий интеллектга топширишни режалаштирмоқда.
"Google" компанияси ички тизимидаги янги дастурий кодларнинг тўртдан уч қисми эндиликда сунъий интеллект ёрдамида яратилаётганини маълум қилди. Генерация қилинган кодлар якуний босқичда муҳандислар томонидан текширувдан ўтказилади. Бу кўрсаткич ўтган йилларга нисбатан кескин ўсишни кўрсатмоқда: 2024 йил октябрь ойида сунъий интеллект улуши 25 фоизни ташкил этган бўлса, 2025 йил кузига келиб 50 фоизга етган эди. Бу ҳақда Devby.io хабар беради.
Компания раҳбари Сундар Пичаи "Google" иш жараёнларини агентли моделларга мослаб қайта қураётганини таъкидлади. Унинг сўзларига кўра, сунъий интеллект ва муҳандислар ҳамкорлиги сезиларли натижа бермоқда. Хусусан, мураккаб код миграцияси жараёни агентлар ёрдамида бир йил олдинги кўрсаткичдан олти баробар тезроқ якунланган.
Ҳозирда дастурчилар код яратиш учун компаниянинг шахсий "Gemini" моделларидан фойдаланмоқда. Сунъий интеллект билан ишлаш кўникмаси ходимларнинг самарадорлигини баҳолашда асосий мезонлардан бирига айланган. Бироқ жараёнлар доим ҳам силлиқ кечаётгани йўқ: "Google DeepMind" ходимларининг бир қисми рақобатчи компаниянинг "Claude Cоде" воситасидан фойдалангани жамоалар ичида келишмовчиликларга сабаб бўлган.
Бошқа технологик гигантлар ҳам ушбу йўналишда фаол ҳаракат қилмоқда. "Microsoft" раҳбари Сатя Наделла айрим лойиҳаларда коднинг 30 фоизи сунъий интеллект томонидан ёзилаётганини айтса, компания техник директори Кевин Скотт беш йил ичида бу кўрсаткич 95 фоизга етишини башорат қилмоқда. "Meta" компанияси эса 2026 йилга бориб муҳандислар ишининг 75 фоизидан ортиғини сунъий интеллектга топширишни режалаштирган.
Изоҳлар 0
…