Bolgariyada mamlakat tarixida ilk marta davlat rahbari vakolatlari ayol siyosatchiga o‘tdi. 2026 yil 23 yanvar, juma kuni Konstitutsiyaviy sud Rumen Radevning iste’fosini rasman tasdiqladi va shundan so‘ng prezidentlik vakolatlari avtomatik tarzda vitse-prezident Iliyana Yotovaga o‘tdi. Bu haqda podrobno.uz xabar beradi.
Konstitutsiyaga ko‘ra, Yotova 2027 yil yanvarigacha — amaldagi muddat yakuniga qadar — davlat rahbari vazifasini bajaradi. Sud Radev vakolatlari uning ixtiyoriy arizasiga asosan muddatidan oldin tugatilganini bir ovozdan ma’qulladi.
2017 yildan beri prezidentlik qilgan, avval Bolgariya Harbiy-havo kuchlariga qo‘mondonlik qilgan Radev zamonaviy demokratik davrda muddat tugamasidan turib o‘z xohishi bilan lavozimni tark etgan ilk prezident bo‘ldi. U qarorini mamlakat siyosiy hayotida faolroq qatnashish va kutilayotgan muddatidan oldingi parlament saylovlariga tayyorgarlik ko‘rish niyati bilan izohladi.
61 yoshli Iliyana Yotova prezidentlik vakolatlarini qabul qilarkan, qayta qasamyod keltirishiga hojat yo‘q: u 2022 yilda vitse-prezident sifatida ikkinchi muddatga kirishganida qasamyod qilgan.
Radev xayrlashuv murojaatida vorisiga to‘liq ishonch bildirdi va uni siyosiy inqiroz sharoitida institutlar barqarorligini ta’minlay oladigan “munosib almashinuv” deb atadi.
Yotovaning siyosiy hamda xalqaro tajribasi salmoqli. Prezident administratsiyasiga kelishidan oldin u telejurnalistikadan boshlab Bolgariya Sotsialistik partiyasi matbuot markazini boshqargan, keyin milliy parlament va Yevropa parlamenti deputati bo‘lgan. Yevropadagi faoliyati davomida terrorizmga qarshi kurash, shaxsiy ma’lumotlarni himoya qilish hamda Bolgariyaning Shengen hududiga qo‘shilishi masalalari bilan shug‘ullangan.
Yangi lavozimda Yotova Bolgariyani xalqaro maydonda namoyon etish bilan birga, parlament fraksiyalari bilan maslahatlashuvlar o‘tkazib, so‘nggi besh yil ichidagi sakkizinchi parlament saylovi sanasini belgilash jarayonini ham boshlab beradi. Kuzatuvchilarga ko‘ra, uning Yevropa institutlari bilan ishlash tajribasi mamlakat ichidagi vaziyatni barqarorlashtirishda muhim omil bo‘lishi mumkin.
“Zamin”ni Telegramʻda oʻqing!
