27 aprel kuni Moskva shahri va Moskva viloyatida kutilmagan ob-havo oʻzgarishi kuzatilib, bahor oʻrtasida qor yogʻishi aholini hayratga soldi. Qor, yaxmalak va kuchli shamol sabab shaharda «sariq darajadagi xavf» eʼlon qilindi.
Gidrometeorologiya markazi maʼlumotiga koʻra, yogʻingarchilik va soniyasiga 18–23 metrgacha yetayotgan shamol kun davomida saqlanib turdi. «Fobos» markazi mutaxassisi Yevgeniy Tishkovets esa bu holatda Moskvada oylik yogʻingarchilik meʼyorining yarmi tushganini taʼkidladi.
Qattiq shamol va qor shahar infratuzilmasiga ham taʼsir qildi. Ayrim hududlarda daraxtlar agʻdarilib, transport harakatiga xalaqit berdi. Xususan, metroning Arbat-Pokrovsk yoʻnalishida daraxt temiryoʻlga qulashi oqibatida «Partizanskaya» va «Shchelkovskaya» bekatlari orasida poyezdlar qatnovi vaqtincha toʻxtatildi.
Aviatsiya sohasida ham jiddiy muammolar kuzatildi. Tun davomida 50 dan ortiq samolyot Vnukovo aeroportidan vaqtida parvoz qila olmadi. Keyinchalik rasmiylar noqulay ob-havo tufayli ayrim reyslar kechiktirilganini tasdiqladi.
Moskva viloyatining Dubna va Domodedovo shaharlarida esa daraxtlar qulashi natijasida elektr taʼminoti qisman uzildi. Shuningdek, Paveletskiy va Savelovskiy yoʻnalishlarida poyezdlar harakati ham cheklandi.
Qisqacha aytganda, aprel Moskvaga “qish kayfiyati”ni qaytardi. Tabiat yana bir bor eslatdi: rejalaring boʻlishi mumkin, lekin oxirgi qaror har doim ob-havoniki.
“Zamin”ni Telegramʻda oʻqing!
