Qirgʻiziston-Tojikiston chegarasida otishma sodir boʻldi

^{Foto: Tabildi Kadirbekov}
Qirgʻiziston va Tojikiston chegarasida ikki davlat chegarachilari oʻrtasida otishma sodir boʻldi. Bu haqda Qirgʻiziston davlat milliy xavfsizlik qoʻmitasi chegara xizmati xabar berdi.

Xabarda aytilishicha, Botken oblasti Laylak rayonidagi Selkana maskanida tojik chegarachilari Qirgʻiziston chegarasini buzib oʻtgan. Ular qirgʻiz chegarachilarining toʻxtash toʻgʻrisidagi talablariga boʻysunmasdan, Qirgʻiziston hududining ichkarisiga 20 metrgacha kirgan.

Qirgʻiziston chegarachilari «ogohlantiruvchi oʻq uzishga majbur boʻlgan».

«Bunga javoban Tojikiston chegarachilari qirgʻiz chegarachilariga qarata oʻt ochdi», - deyiladi xabarda.

Otishmani muzokaralar orqali toʻxtatishga muvaffaq boʻlingan, ammo qoʻshimcha kuchlar etib kelgach, otishma qaytadan boshlangan.

«Navbatdagi otishma taxminan 30 daqiqa davom etdi. Takroriy otishma chogʻida Qirgʻiziston Respublikasi harbiy xizmatchisi yaralandi. Shundan keyin Tojikiston tomoni Qirgʻizistonning Dostuk qishlogʻini minomyotlardan oʻqqa tuta boshladi. Qirgʻiziston Respublikasi chegara xizmati tojik hamkasblarni vaziyatning keskinlashuviga yoʻl qoʻymaslikka chaqiradi», deyiladi Qirgʻiziston chegara xizmati xabarida.

Tojikiston va Qirgʻiziston chegarasida navbatdagi keskinlik mart oyi oʻrtalarida yuzaga kelgandi. 14 mart kuni Dushanbedagilar Qirgʻiziston kuchlari Tojikistonning Somoniyon qishlogʻini oʻqqa tutishgani haqida xabar bergandi. “Zamin” yangiliklarini “Telegram”da kuzatib boring