«Napoli» bosh murabbiyi Antonio Konte jamoa hujumchisi Romelu Lukakuning harakatlaridan noroziligini ochiqchasiga bildirdi. Murabbiyning so'zlariga ko'ra, belgiyalik futbolchi klub qarorgohiga kelgan bo'lsa-da, murabbiy bilan ko'rishishni lozim topmagan. Bu haqda Goal.com xabar beradi.
Lukaku uzoq muddatli jarohatidan so'ng Belgiyada reabilitatsiya kursini o'tab qaytgan edi. U Italiyaga kelib klub rahbariyati bilan uchrashgan, biroq Konte bilan yuzma-yuz gaplashish uchun uning xonasiga kirmagan.
Bu holat murabbiy va futbolchi o'rtasidagi yaqin munosabatlarga putur yetkazishi mumkin.
«Direktorlarimizdan biri u bilan gaplashganini bilaman, u mashg'ulot bazasiga keldi, mening xonam esa o'sha yerda edi. Lekin hech kim eshikni taqillatmadi.
Men undan salom yoki xabar kutgan edim, bu meni juda xafa qildi», — dedi Konte matbuot anjumanida.
Konte har doim futbolchilarni tushunishga harakat qilishini, biroq o'yinchilar murabbiyni tushunish uchun harakat qilmayotganini ta'kidladi. Avgust oyidan beri jarohati sabab bor-yo'g'i yetti o'yinda maydonga tushgan Lukaku hozirda sport formasini tiklash ustida ishlamoqda.
Hujumchining «Napoli» bilan shartnomasi kelasi mavsum oxirida yakuniga yetadi. U 2026 yilgi jahon chempionatida Belgiya terma jamoasi safida ishtirok etish uchun tezroq maydonga qaytishni va o'z darajasini isbotlashni maqsad qilgan.
“Zamin”ni Telegramʻda oʻqing!
