Myunxenning "Bavariya" klubi o'ng qanot himoyasidagi muammolarni hal qilish uchun "Inter" a'zosi Denzel Dumfrisni asosiy nishon sifatida tanladi. Jamoaning yangi bosh murabbiyi Vinsent Kompani niderlandiyalik futbolchini tarkibda ko'rmoqchi. Bu haqda Goal.com xabar beradi.
29 yoshli himoyachi uchun kurashda "Manchester Siti" va "Barselona" klublari ham ishtirok etmoqda. Dumfris yaqinda agentini o'zgartirgani uning Italiya A Seriyasini tark etishga tayyorligidan dalolat beradi.
"Bavariya" rahbariyati tajribali futbolchini Konrad Laymer va Yosip Stanishichga qaraganda ishonchliroq variant deb hisoblamoqda. Garchi Dumfrisning "Inter" bilan shartnomasi 2028 yilgacha amal qilsa-da, Milan klubi uni yozda sotishga tayyor.
Futbolchi 2025 yil oxirida to'pig'idan jarohat olib, uch oyga safdan chiqqan edi. Fevral oyida maydonga qaytgan himoyachi o'zining jismoniy holati joyida ekanini isbotladi va jamoasining chempionlik sari yurishiga yordam bermoqda.
Mavsum yakunlangach, klublar o'rtasidagi muzokaralar jadallashishi kutilmoqda. Myunxenliklar raqiblarini ortda qoldirish uchun transfer oynasi ochilishi bilan rasmiy taklif yuborishni rejalashtirgan.
“Zamin”ni Telegramʻda oʻqing!
