Tadqiqot: qahva insult xavfini oshiradi, choy esa kamaytiradi

^{Foto: Shutterstock}
Insultni rivojlantiruvchi omillarni oʻrganadigan Interstroke xalqaro loyihasi qariyb 27 ming kishi ishtirokidagi soʻnggi tadqiqot natijalarini e'lon qildi. Ishtirokchilarning yarmi birinchi marta insultni boshdan kechirganlar boʻldi.

Tadqiqotda 27 mamlakatdan 61—63 yosh oraligʻida boʻlgan turli jinsdagi 26 952 kishi ishtirok etdi. Ularning 59 foizi erkaklar. Barcha ishtirokchilar kasallik tarixi, turmush tarzi va har kuni iste'mol qiladigan ichimliklari haqida anketa toʻldirdi.

Ishtirokchilarning gazlangan ichimlik va meva sharbatlarini iste'mol qilishiga qaratilgan tadqiqot quyidagilarni koʻrsatdi:

• Gazli ichimliklar, jumladan shakar yoki sun'iy shirinlashtirgich qoʻshilgan ichimliklar insult xavfini 22 foizga oshiradi;
  
• Gazli ichimliklar va insult ehtimoli oʻrtasidagi bogʻliqlik Sharqiy/Markaziy Evropa, Yaqin Sharq, Afrika va Janubiy Amerikada yuqori;
  
• Tadqiqotga koʻra, meva sharbati sifatida sotiladigan koʻplab mahsulotlar kontsentratlardan tayyorlanadi va qoʻshimcha shakar va konservantlarni oʻz ichiga oladi. Bunday ichimliklar insult ehtimolini 37 foizga oshiradi;
  
• Ayollarda meva sharbati/ichimliklari bilan bogʻliq insult ehtimoli yuqori;
  
• Kuniga 7 stakandan koʻproq oddiy suv ichish insult xavfini kamaytiradi.

Bundan tashqari, olimlar kuniga toʻrt chashka qahva iste'mol qilganda insult ehtimoli 37 foizga oshishini aniqladi. Ammo bu faqat ichimlikning oʻziga emas, balki qon bosimi holatiga va yurak urish tezligiga ham bogʻliq boʻlishi mumkin. Ta'kidlanishicha, qahvani kamroq iste'mol qilish insult xavfini tugʻdirmaydi.

Choy esa sogʻlik uchun nafaqat xavfsiz, balki foydali boʻlib qolmoqda. Tadqiqotdan ma'lum boʻlishicha, har kuni uch-toʻrt piyola choy ichilsa, choy turiga qarab, insult xavfi 18-29 foizgacha kamayishi mumkin. Eng yaxshi natijaga (29 foiz) erishish uchun olimlar sut qoʻshilmagan qora choyni tavsiya etadi. Shu bilan birga, koʻk choy ham insult xavfini 27 foizga kamaytiradi.

Ammo topilmalarda muhim geografik farqlar aniqlandi — choy Xitoy va Janubiy Amerikada insult xavfini pasaytirsa, Janubiy Osiyoda kasallik ehtimolini oshirishi mumkinligi qayd etildi. “Zamin” yangiliklarini “Telegram”da kuzatib boring