Kuchli yomg‘ir yog‘ayotgan payt. Shahar chorrahalaridan birida Yo‘l-patrul xizmati xodimi jala ostida ivib, yo‘l harakatini tartibga solishda davom etmoqda. Ob-havoning og‘irligiga qaramay, u o‘z vazifasini sidqidildan bajarayotgani atrofdagilar e’tiboridan chetda qolmadi.
Shu payt kutilmagan holat yuz berdi — odamlar orasidan bir erkak yugurib chiqib, to‘g‘ri inspektor yoniga bordi. U ortiqcha so‘zsiz, xodimga yomg‘irpo‘sh kiydirib, uni jala ostida qolib ketishdan himoya qildi.
Bu sodda, ammo samimiy harakat guvohlarni befarq qoldirmadi. Atrofdagilar o‘z his-tuyg‘ularini yashira olmay, qarsak chalib yuborishdi. Ko‘pchilik bu holatni insoniylik va mehr-oqibatning yorqin namunasiga yo‘ydi.
Jizzax shahrida tasvirga olingan ushbu video qisqa fursatda ijtimoiy tarmoqlarda keng tarqalib, minglab foydalanuvchilarning e’tiborini tortdi. Foydalanuvchilar izohlarda bunday ezgu ishlar jamiyatga iliqlik va ishonch olib kirishini ta’kidlamoqda.
Darhaqiqat, ba’zan katta gaplar emas, aynan shunday kichik, ammo chin dildan qilingan amallar inson qalbiga eng kuchli ta’sir o‘tkazadi.
“Zamin”ni Telegramʻda oʻqing!
