Shay Shwartz yoshligida xakerlik bilan shug‘ullangan bo‘lsa-da, 16 yoshida qo‘lga olingach, o‘z iqtidorini hujumlarni amalga oshirish emas, balki ularning oldini olishga yo‘naltirishga qaror qildi. U o‘n yil davomida Isroilning elita mudofaa va razvedka bo‘linmalarida, jumladan, Iron Dome loyihasida muhim vazifalarni bajardi. Keyinchalik HPE tomonidan sotib olingan Axis kompaniyasida ishlagan mutaxassis, nihoyat, o‘zining Ocean startapini ishga tushirdi. Bu haqda Techcrunch.com xabar beradi.
Ocean — bu sun’iy intellekt yordamida amalga oshiriladigan fishing hujumlariga qarshi kurashuvchi agentli elektron pochta xavfsizligi platformasidir. Kompaniya yashirin rejimdan chiqib, Lightspeed Venture Partners boshchiligidagi investorlardan 28 million dollar miqdorida sarmoya jalb qilganini e’lon qildi. Loyihaga Wiz, Armis kabi yirik kompaniyalar asoschilari ham sarmoya kiritishgan.
Shwartzning ta’kidlashicha, sun’iy intellekt fishing hujumlarini avtomatlashtirib, ularning ko‘lamini keskin oshirib yubordi. Hozirgi kunda LLM texnologiyalari yordamida har bir shaxsga moslashtirilgan, juda aniq va ishonarli fishing xabarlarini yaratish osonlashgan. Proofpoint yoki Mimecast kabi an’anaviy yechimlar bu kabi murakkab hujumlarni aniqlashda qiynalishi mumkin.
Ocean platformasi har bir kiruvchi elektron pochtaning kontekstini chuqur tahlil qilib, firibgarlik va o‘zini boshqa shaxs deb ko‘rsatish urinishlarini aniqlaydi. Startap allaqachon Kayak, Kingston Technology va Headspace kabi mijozlar uchun har oy milliardlab xatlarni tekshirmoqda. Ocean buning uchun maxsus kichik til modelidan foydalanadi.
“Zamin”ni Telegramʻda oʻqing!
