Samarqand viloyatida korrupsiya bilan bog‘liq yana ikki holat fosh qilindi. Davlat xavfsizlik xizmati xodimlari tomonidan o‘tkazilgan tezkor tadbirlarda soliq tizimi va mahalliy hokimiyatda faoliyat yuritgan mas’ul shaxslar noqonuniy pul olish bilan bog‘liq holatlarda ushlandi.
Ma’lum qilinishicha, Bulung‘ur tumanida faoliyat olib boruvchi “Buxgalteriya markazi” davlat muassasasi hisobchisi fermer xo‘jaligiga hisoblangan 150 million so‘mlik soliq qarzdorligini kamaytirib berishni va’da qilgan. U bu xizmati evaziga fermer xo‘jaligi rahbaridan avval 3 million so‘m olgan.
Keyinchalik mazkur hisobchi yana qo‘shimcha 15 million so‘m talab qilgan. U ushbu mablag‘ni Bulung‘ur tumani soliq inspeksiyasi boshlig‘i o‘rinbosari bilan birgalikda olayotgan vaqtda DXX hamda Iqtisodiy jinoyatlarga qarshi kurashish departamenti xodimlari tomonidan ashyoviy dalillar bilan qo‘lga olingan.
Yana bir holat Kattaqo‘rg‘on tumanida aniqlangan. 2025 yilda tuman hokimi o‘rinbosari lavozimida ishlagan shaxs fuqaroni tibbiyot birlashmasiga ishga joylashtirib qo‘yishni va’da qilgan. U buning evaziga 14 million so‘m olgani, ammo bergan va’dasini bajarmagani ma’lum bo‘lgan.
Tezkor tadbir davomida hozirda sobiq hokim o‘rinbosari hisoblangan ushbu shaxs olgan pul mablag‘ining bir qismini, ya’ni 1000 AQSH dollarini qaytarib berayotgan vaqtda fosh etilgan.
Hozirda har ikki holat yuzasidan jinoyat ishlari qo‘zg‘atilgan. Tergov harakatlari davom etmoqda.
Bu kabi holatlar mansab vakolati, ishonch va davlat tizimidagi mas’uliyatdan shaxsiy manfaat yo‘lida foydalanish qanchalik og‘ir oqibatlarga olib kelishini yana bir bor ko‘rsatmoqda. Soliq qarzini “kamaytirib berish” yoki ishga joylashtirish va’dasi ortida fuqarolarning ishonchi, tadbirkorlarning mehnati va davlat tizimiga bo‘lgan munosabat turadi.
Qisqasi, Samarqandda fosh etilgan ushbu ikki holat korrupsiyaga qarshi kurash hali ham dolzarb ekanini ko‘rsatdi. Qonundan aylanib o‘tishga uringanlar oxir-oqibat qonun oldida javob beradi. Bu yerda formula oddiy: xizmat — xalq uchun, lavozim — shaxsiy foyda uchun emas.
“Zamin”ni Telegramʻda oʻqing!
