Yurtimiz fuqarolari uchun xorijda munosib va yuqori daromadli mehnat faoliyatini olib borish bo‘yicha yangi va ishonchli ufqlar ochilmoqda. Endilikda hamyurtlarimiz AQSHning nufuzli H-2A dasturi doirasida Okeon ortida 10 oygacha bo‘lgan muddatda qishloq xo‘jaligi tarmog‘ida qonuniy ishlash imkoniyatini qo‘lga kiritishlari mumkin. Bu borada AQSH va O‘zbekiston o‘rtasidagi sheriklik aloqalari yangi bosqichga chiqmoqda.
Toshkent migratsiya forumidagi muhim bayonot
Ushbu quvonarli yangilik poytaxtimizda bo‘lib o‘tgan birinchi Toshkent xalqaro migratsiya forumida ma’lum qilindi. Tadbirda ishtirok etgan Amerikaning mashhur «USA Farm Labor» kompaniyasi asoschisi va bosh ijrochi direktori Manuel Fikning ta’kidlashicha, ayni paytda O‘zbekiston hukumati bilan hamkorlikda fuqarolarimizni AQSH qishloq xo‘jaligi sektoriga jalb etish bo‘yicha keng qamrovli loyihalar ustida ish olib borilmoqda.
“Bu istiqbolli sheriklik AQSHdagi fermerlar va ish beruvchilar uchun ishchi kuchi taqchilligi muammosini samarali hal etsa, ikkinchi tomondan, o‘zbekistonliklarga okeon ortida halol mehnat qilib, yuqori daromad topish hamda o‘z oilalari farovonligini yuksaltirish uchun ajoyib imkoniyatdir”, — dedi Manuel Fik.
Huquqiy himoya va munosib sharoit kafolatlanadi
AQSH vakilining alohida qayd etishicha, Qo‘shma Shtatlarda mehnatkashlarning haq-huquqlarini himoya qilish tizimi o‘ta qat’iy shakllangan. Mamlakat qonunchiligi ishchilarning xavfsizligini ta’minlash, har qanday ko‘rinishdagi ekspluatatsiya va odam savdosi illatlariga qarshi keskin kurashadi.
Shu bois, ushbu rasmiy dastur orqali AQSHga yo‘l oladigan o‘zbekistonlik mavsumiy ishchilar to‘liq huquqiy kafolat va xalqaro standartlarga mos keluvchi munosib mehnat sharoitlari bilan ta’minlanadi.
Amerikaliklar ingliz tilini biladigan yoshlarni kutmoqda
Manuel Fikning so‘zlariga ko‘ra, okean ortidagi ish beruvchilar O‘zbekistondan keladigan yosh, g‘ayratli, mehnatsevar hamda eng muhimi — ingliz tilini so‘zlashuv darajasida biladigan malakali xodimlarga katta qiziqish bildirmoqda.
Bu hamkorlik nafaqat ikki tomon uchun moliyaviy foyda keltiradi, balki yurtdoshlarimiz uchun AQSHning ilg‘or agrar texnologiyalari, zamonaviy tajribalari va professional kasbiy ko‘nikmalarini o‘zlashtirishda beqiyos maktab vazifasini o‘taydi.
Sizningcha, AQSHdagi mana shunday rasmiy mehnat dasturlarining ko‘payishi yurtimizda qonuniy migratsiya rivojlanishiga qanchalik hissa qo‘shadi?
“Zamin”ni Telegramʻda oʻqing!
