Buxoro shahrida ko‘p qavatli uylardan birida sodir bo‘lgan yong‘in aholi orasida xavotir va sarosimani keltirib chiqardi. Hodisa 16 may kuni Shirbudin mahallasi hududida kuzatilgan.
Guvohlarning aytishicha, olov binoning tom qismida paydo bo‘lib, qisqa vaqt ichida qora tutun atrofni qoplagan. Holatni ko‘rgan aholi zudlik bilan hovliga chiqishgan.
Fuqarolar voqeani qo‘rquv bilan esga olishmoqda. Ular orasida bolalar yig‘isi, keksalarning sarosima bilan bir-birini chaqirishi va umumiy vahima muhiti kuzatilgani ta’kidlanmoqda. Qutqaruvchilar yetib kelgach, vaziyat biroz barqarorlashgan.
Buxoro viloyati Favqulodda vaziyatlar boshqarmasi ma’lumotiga ko‘ra, yong‘in haqidagi xabar soat 15:57 da «112» tizimi orqali kelib tushgan. Yong‘inga qarshi tezkor choralar ko‘rilgan.
Qutqaruv xizmati xodimlari qisqa vaqt ichida hodisa joyiga yetib kelib, yong‘inga qarshi tezkor choralar ko‘rishgan hamda aholini xavfsiz hududga evakuatsiya qilishgan. Yong‘in soat 17:25 da to‘liq bartaraf etilgan.
Rasmiy ma’lumotlarga ko‘ra, hodisa oqibatida jabrlanuvchilar qayd etilmagan. Hozirda yong‘in sabablari va yetkazilgan zarar miqdori bo‘yicha o‘rganish ishlari davom etmoqda.
“Zamin”ni Telegramʻda oʻqing!
