Seshanba kuni boʻlib oʻtgan Google I/O konferensiyasida Google kompaniyasi barcha onlayn xaridlarni bir joyda boshqarish imkonini beruvchi Universal Cart agentlik xabini taqdim etdi. Shuningdek, texnologiya giganti Agent Payments Protocol (AP2) yangilanishlarini eʼlon qilib, yaqin oylarda foydalanuvchilar nomidan toʻlovlarni amalga oshira oladigan sunʼiy intellekt agentlarini oʻz mahsulotlariga joriy etishini maʼlum qildi. Bu qadam Googleʼning sunʼiy intellekt yordamchilarini oddiy tavsiya vositalaridan faol savdo ishtirokchilariga aylantirish strategiyasini anglatadi. Bu haqda Techcrunch.com xabar beradi.
Universal Cart yordamida foydalanuvchilar Google Search, Gemini bilan muloqot, YouTube yoki Gmail orqali topilgan mahsulotlarni yagona savatchaga qoʻshishlari mumkin. Tizim avtomatik ravishda chegirmalarni kuzatib boradi, narxlar pasayishi haqida xabar beradi va mahsulot qayta sotuvga chiqqanda foydalanuvchini ogohlantiradi. Ushbu funksiya odamlarning turli qurilmalar va doʻkonlar oʻrtasida bir necha kun davomida xarid qilish odatlarini hisobga olgan holda ishlab chiqilgan.
Sunʼiy intellekt xaridorlarga toʻgʻri qaror qabul qilishda ham koʻmaklashadi. Masalan, foydalanuvchi kompyuter yigʻayotgan boʻlsa, Universal Cart turli doʻkonlardan tanlangan qismlarning bir-biriga mosligini tekshiradi va xatolik boʻlsa, muqobil variantlarni taklif qiladi. Shuningdek, Google Wallet bilan integratsiya tufayli sayohatchilar va bonus yigʻuvchilar yashirin chegirmalar hamda ballardan maksimal darajada foydalanish imkoniyatiga ega boʻladilar.
Googleʼning ochiq standartli Universal Commerce Protocol (UCP) tizimi tufayli foydalanuvchilar toʻlovni bevosita Google orqali yoki sotuvchi saytiga oʻtib amalga oshirishlari mumkin. Universal Cart hozirda AQSHda ishga tushirildi va yozda Gemini ilovasiga, keyinchalik YouTube va Gmail platformalariga qoʻshiladi. Shuningdek, UCP tizimi mehmonxonalar va oziq-ovqat yetkazib berish xizmatlari kabi yangi yoʻnalishlar bilan kengayishi kutilmoqda.
Sohadagi eng muhim yangiliklardan biri boʻlgan AP2 protokoli sunʼiy intellekt agentlariga belgilangan limitlar doirasida foydalanuvchi nomidan xavfsiz toʻlovlarni amalga oshirishga ruxsat beradi. Foydalanuvchilar oʻzlari xohlagan brendlar, mahsulotlar va xarajat chegarasini belgilab qoʻyishlari mumkin. Ushbu shartlar bajarilganda, agent xaridni avtomatik ravishda yakunlaydi.
“Zamin”ni Telegramʻda oʻqing!
