O‘zbekiston energetika sohasida qayta tiklanuvchi energiya manbalarining ulushini oshirishni rejalashtirmoqda. Joriy yil boshidan buyon mamlakatda ishlab chiqarilgan elektr energiyasining 23 foizi qayta tiklanuvchi manbalardan olingan.
Energetika vazirligi ma’lumotlariga ko‘ra, bu ko‘rsatkich 2030 yilga kelib 54 foizga yetkaziladi. Bugungi kunda O‘zbekistonda jami quvvati 4,7 ming MVt bo‘lgan 13 ta quyosh va 5 ta shamol elektr stansiyasi faoliyat yuritmoqda.
Ushbu stansiyalar 9,7 milliard kVt·soat elektr energiyasi ishlab chiqardi. Bu orqali 2,8 milliard kub metr tabiiy gaz tejashga va 4,2 million tonna zararli moddalar chiqindisini oldini olishga muvaffaq bo‘lindi.
Xususiy sektor, korxonalar va ijtimoiy inshootlarda ham quyosh panellari o‘rnatilishi davom etmoqda. Ularning umumiy quvvati 1,9 ming MVtni tashkil etadi, shuningdek, 4,85 million litr hajmda quyosh suv isitish kollektorlaridan foydalanilmoqda.
Bu orqali qo‘shimcha 761 million kub metr gaz tejash va 905 ming tonna zararli moddalar chiqindisini kamaytirishga erishildi. Issiqlik elektr stansiyalarida ham zamonaviy ekologik texnologiyalar joriy etilmoqda.
Toshkent issiqlik elektr markazida yangi gaz turbinali qurilmalar, avtomatik monitoring tizimlari va filtrlash uskunalari o‘rnatildi. Bu yillik zararli moddalar chiqindisini 200 tonnaga kamaytirishga yordam berdi.
Shuningdek, 2025 yilgacha «Yashil makon» loyihasi doirasida yoqilg‘i-energetika kompleksi korxonalari tomonidan 2,5 milliondan ortiq daraxt ekilib, ishlab chiqarish obyektlari atrofida yangi ekologik zonalar tashkil etildi.
Mehmon guruhidagi foydalanuvchilar ushbu nashrga izoh qoldira olmaydi.
