«Lokomotiv»ning sobiq prezidenti Nikolay Naumov «Benfika» bosh murabbiyi Joze Mourinyo faoliyatini davom ettirish uchun qaysi liga mos bo'lishi mumkinligi haqida fikr bildirdi. U bu boradagi mulohazalarini «Yevro-Futbol.Ru» nashriga bergan intervyusida aytib o'tdi. Bu haqda euro-football.ru xabar beradi.
Naumovning ta'kidlashicha, Mourinyoning eng kuchli davri ortda qolgan: mutaxassis uning biroz tanaffus qilishi kerakligini, zamonaviy futbol talablariga moslashishda esa ortda qolayotganini qayd etdi. Uning fikricha, avvallari sirli va kutilmagan qarorlari bilan ajralib turgan murabbiy hozir odatiyroq ko'rinmoqda.
Naumov Mourinyo uchun eng qulay yo'nalish sifatida Saudiya Arabistonini tilga oldi. U yerda maoshlar yuqori ekani, shov-shuvlarni yoqtirishlari va yoshi katta, nomdor futbolchilar bilan ishlash imkoniyati borligini aytib, aynan shu chempionat portugaliyalik murabbiyga mos tushishini qo'shimcha qildi.
Eslatib o'tamiz, Mourinyo boshqaruvidagi «Benfika» Chempionlar ligasi 1/16 finalida Madridning «Real» jamoasiga qarshi maydonga tushadi. Ilk uchrashuv 17 fevral kuni Portugaliyada bo'lib o'tadi.
“Zamin”ni Telegramʻda oʻqing!
