Janubiy Amerikadagi Kolumbiyada yana bir tashvishli hodisa qayd etildi — yangi qurib bitkazilgan koʻprik ochilish marosimi vaqtida kutilmaganda qulab tushdi. Mazkur holat Choko departamenti tarkibiga kiruvchi Bagado munitsipaliteti hududida sodir boʻlgani maʼlum qilinmoqda.
Need To Know portali tarqatgan maʼlumotlarga koʻra, voqea 19 aprel kuni tantanali ochilish marosimi chogʻida roʻy bergan. Piyodalar uchun moʻljallangan mazkur koʻprik 85 metr uzunlikda boʻlib, mahalliy aholiga shahar markazidan San-Marino qishlogʻiga qulay oʻtish imkoniyatini yaratib berishi koʻzlangan edi.
Marosim davomida shahar rahbarlari va aholi vakillari yangi inshootdan oʻtishni boshlagan paytda koʻprik kuchli chayqalishni boshlagan. Oradan koʻp oʻtmay, uni ushlab turgan arqonlar uzilib, butun konstruksiya daryoga qulab tushgan. Koʻprik ustida boʻlgan barcha odamlar suvga tushib ketgan.
Dastlabki maʼlumotlarga koʻra, hodisa oqibatida sakkiz nafar fuqaro turli darajada jarohat olgan, ulardan uch nafari shifoxonaga yotqizilgan. Eng muhimi, hech qanday halokat holati qayd etilmagani qayd etilmoqda.
Voqea joyida boʻlgan guvohlar bu holatni katta hayrat va shok bilan qabul qilganini taʼkidlamoqda. Mahalliy hokimiyat rahbari ham bu voqeadan soʻng munosabat bildirib, qurilish sifatiga jiddiy eʼtibor qaratilganini aytgan, biroq hodisaning bunday yakun topishi kutilmaganini tan olgan.
"Men muhandis ham, ishboshi ham emasman, materiallarni ham yaxshi tushunmayman, lekin bu qurilish sifatli boʻlishini aniq talab qilganman. Xudoga shukur, hamma tirik, ammo sakkiz kishi jarohatlangan," - dedi Serna meri voqeadan soʻng.
Ayni paytda mutasaddi tashkilotlar hodisa sabablarini atroflicha oʻrganmoqda. Tergov jarayonida koʻprikni qurgan kompaniya ham jalb etilgan. Ilk taxminlarga koʻra, inshoot bir vaqtning oʻzida koʻp sonli odamlar yuklamasiga dosh berolmagan boʻlishi mumkin.
Ushbu voqea yana bir bor qurilish sifati va xavfsizlik talablariga rioya qilish qanchalik muhim ekanini koʻrsatib berdi. Endi esa jamoatchilik bir savolni oʻrtaga tashlamoqda: nega yangi qurilgan koʻprik shunday qisqa vaqt ichida sinovdan oʻta olmadi?
“Zamin”ni Telegramʻda oʻqing!
