Vinisius «Real Madrid»da qolish uchun maoshini kamaytirishga rozi bo'ldi
Braziliyalik hujumchi Vinisius Junior "Real Madrid" bilan yangi uzoq muddatli shartnoma imzolashga kelishib oldi. Muzokaralar davomida futbolchi jamoada qolish uchun o‘zining yuqori maosh talablaridan voz kechdi va Kilian Mbappedan kamroq haq olishga rozi bo‘ldi. Bu kelishuv uning Saudiya Arabistoni klublariga o‘tishi haqidagi mish-mishlarga chek qo‘ydi. 2018-yildan buyon "qirollik klubi" safida to‘p surayotgan yulduz shu vaqtgacha 124 ta gol urib, jamoasi bilan ko‘plab nufuzli sovrinlarni qo‘lga kiritgan.
Braziliyalik hujumchi Vinisius Junior yaqin kelajakda "Real Madrid" safida qolishga qaror qildi. Sky nashri xabariga ko'ra, uzoq davom etgan muzokaralardan so'ng tomonlar yangi uzoq muddatli shartnoma bo'yicha kelishuvga erishgan. Hozirda kelishuvning so'nggi tafsilotlari aniqlashtirilmoqda. Bu haqda Goal.com xabar beradi.
Vinisiusning amaldagi shartnomasi 2027 yilda yakuniga yetadi. Futbolchi bir yil avval yangi bitim imzolashini aytgan bo'lsa-da, jarayon cho'zilib ketgani sababli uning Saudiya Arabistoni klublariga o'tishi haqida mish-mishlar tarqalgan edi. Ma'lum bo'lishicha, klub rahbariyati hujumchining yuqori maosh talabini qondirishni istamagan va muzokaralar bir muddat to'xtab qolgan.
Vaziyat yanada keskinlashishiga sobiq murabbiy Xabi Alonso bilan yuzaga kelgan kelishmovchilik sabab bo'lgan. O'tgan yilgi "Barselona"ga qarshi o'yinda zaxiraga olingan Vinisius o'z noroziligini ochiq bildirgan edi. Biroq yanvar oyida Alonsoning o'rniga Alvaro Arbeloa kelgach, futbolchi o'zini jamoada qadrliroq his qila boshladi va yangi shartnomaga rozilik berdi.
Yangi kelishuvga ko'ra, Kilian Mbappe "Real Madrid"ning eng ko'p maosh oluvchi futbolchisi bo'lib qoladi. Vinisius jamoada eng ko'p haq oladigan o'yinchi bo'lish niyatidan qaytib, Mbappedan kamroq maosh olishga rozi bo'lgan. Hozircha keyingi mavsumda jamoani kim boshqarishi noma'lum, chunki Arbeloa iste'foga chiqishi kutilmoqda. Nomzodlar orasida Dide Desham va Sebastyan Xenness bor.
Vinisius 2018 yilda "Flamengo"dan Madridga ko'chib o'tgan edi. O'tgan vaqt davomida u 370 ta o'yinda maydonga tushib, 124 ta gol urdi. Braziliyalik yulduz "Real Madrid" bilan ikki marta Yevropa Chempionlar ligasi va uch marta Ispaniya chempionligini qo'lga kiritgan.
Izohlar 0
…