«Manchester Siti» yozda tarkibni kuchaytirish uchun nomzodlarni belgiladi
"Manchester City" klubi kelasi yozgi transfer oynasida tarkibni bir necha pozitsiyalar bo'yicha kuchaytirishni rejalashtirmoqda. Jamoaning asosiy nishonlari qatorida yarim himoyachi Elliot Anderson hamda hujumchilar Yan Diomande va Eli Krupi borligi aytilmoqda. Shuningdek, himoya chizig'ini mustahkamlash maqsadida "Feyenoord" a'zosi Jivayro Rid nomzodi ham ko'rib chiqilmoqda. Ushbu transferlar orqali "shaharliklar" tarkibdagi raqobatni oshirib, yangi sovrinlar uchun kurashishni maqsad qilgan.
Angliya grandi "Manchester Siti" kelasi yozgi transfer oynasi oldidan tarkibni yanada mustahkamlash ustida jiddiy ish boshlagan. Klub rahbariyati bir nechta pozitsiyalarni kuchaytirishni rejalashtirayotgani va bu borada aniq nomzodlar shakllangani maʼlum boʻldi.
Sky Sports tarqatgan maʼlumotlarga koʻra, “shaharliklar” birinchi navbatda yarim himoya chizig‘ini kuchaytirishga eʼtibor qaratmoqda. Bu borada asosiy nishon — Elliot Anderson boʻlib, u hozirda "Nottingem Forest" safida toʻp surmoqda. Yosh va istiqbolli xavbekga qiziqish yuqori, ammo uning transfer narxi balandligi sabab muzokaralar oson kechmasligi aytilmoqda.
Shu bilan birga, klub hujum chizig‘ini ham yanada kuchaytirish variantlarini koʻrib chiqmoqda. Potensial nomzodlar roʻyxatiga Yan Diomond kiritilgan boʻlib, u "RB Leypsig"da qanot hujumchisi sifatida faoliyat yuritmoqda. Uning tezligi va dribling qobiliyati “Siti” uslubiga mos kelishi mumkin.
Bundan tashqari, "Bornmut" forvardi Eli Krupi ham jamoa diqqat markazida turibdi. U hujum chizigʻida raqobatni oshirish va rotatsiyani kuchaytirish uchun munosib variant sifatida baholanmoqda.
Faqat hujum va markaz emas, himoya chizigʻida ham oʻzgarishlar kutilmoqda. Xususan, oʻng qanot himoyasi pozitsiyasini mustahkamlash maqsadida "Feyenoord" futbolchisi Jivayro Rid nomzodi koʻrib chiqilmoqda. Uning universalligi va jismoniy tayyorgarligi klub talablariga mos kelishi mumkin.
Umuman olganda, "Manchester Siti" yangi mavsum oldidan tarkibni sifat jihatdan kuchaytirishni maqsad qilgan. Klub bir vaqtning oʻzida bir nechta pozitsiyani mustahkamlash orqali raqobatbardoshlikni saqlab qolish va yangi trofeylar uchun kurashni davom ettirishni rejalashtirmoqda.
Izohlar 0
…