Fransiyaning "PSJ" klubi Chempionlar ligasi yarim finali doirasidagi "Bavariya"ga qarshi bahs oldidan o'z ichki chempionatida ishonchli g'alabaga erishdi. Parijliklar safarda "Anjer" jamoasini 3:0 hisobida mag'lub etib, turnir jadvalidagi peshqadamligini mustahkamladi. Bu haqda Goal.com xabar beradi.
Uchrashuvda Kang-In Li, Senni Mayulu va Lukas Beraldo tomonidan kiritilgan gollar mehmonlarga muvaffaqiyat keltirdi. Jamoa bosh murabbiyi Luis Enrike ushbu bahsda Usmon Dembele va Xvicha Kvarasxeliya kabi yetakchi futbolchilarga dam berishga qaror qildi.
Luis Enrike o'yindan so'ng jamoasining holatidan mamnunligini bildirdi. «Bunday natija Chempionlar ligasi yarim finali uchun eng yaxshi tayyorgarlikdir.
Bu har bir o'yinchi, jamoa va muxlislar ishonchi uchun muhim. Biz tayyormiz», — dedi mutaxassis.
Shu bilan birga, parijliklar tarkibida jarohat bilan bog'liq xavotirlar yuzaga keldi. Himoyachilar Ashraf Hakimi va Lukas Ernandes noqulaylik sababli tanaffusda almashtirildi.
Hozircha ularning Myunxen klubiga qarshi maydonga tushishi so'roq ostida turibdi.
Eslatib o'tamiz, "Bavariya" o'zining so'nggi o'yinida "Mayns" ustidan 4:3 hisobida qiyin g'alabaga erishgan edi. Ikki grand jamoa o'rtasidagi Chempionlar ligasining dastlabki uchrashuvi seshanba kuni Parijda bo'lib o'tadi.
“Zamin”ni Telegramʻda oʻqing!
