Yevropa Chempionlar ligasining yarim final dastlabki uchrashuvi doirasidagi "PSJ" va "Bavariya" jamoalari o'rtasidagi bahsni boshqarib boradigan hakamlar brigadasi ma'lum bo'ldi. UEFA ushbu mas'uliyatli o'yinga shveysariyalik Sandro Shererni tayinladi. Bu haqda Goal.com xabar beradi.
Bu tayinlov Myunxen klubi muxlislarida biroz xavotir uyg'otmoqda.
Vinsent Kompani shogirdlari Parijdagi "Park de Prens" stadionida 2020-yildan buyon ilk bor final yo'llanmasini qo'lga kiritish uchun maydonga tushadilar. Sherer faoliyati davomida myunxenliklar ishtirokidagi o'yinlarda ikki marta hakamlik qilgan.
Agar 2020/21-yilgi mavsumda "Lokomotiv" ustidan qozonilgan 2:0 hisobidagi g'alaba ijobiy bo'lsa, o'tgan mavsumdagi natija boshqacha ko'rinish olgan.
O'tgan yili chorak finalning dastlabki bahsida "Bavariya" o'z maydonida "Inter"ga 1:2 hisobida imkoniyatni boy bergan edi. O'shanda Shererning hakamligi borasida e'tirozlar bo'lmagan bo'lsa-da, aynan o'sha mag'lubiyat nemis klubining turnirdan chiqib ketishiga asosiy sabab bo'lgan edi.
Shu bilan birga, Sherer boshqargan o'yinlarda boshqa nemis klubi — "Borussiya Dortmund" muvaffaqiyat qozongan. Nimchorak finalda "Lill" ustidan qozonilgan g'alabadan so'ng, fransuz klubi prezidenti Olivye Letang hakamni tanqid qilib, uning faqat nemis tilida gaplashgani va bu holat shubhali ekanini ta'kidlagan edi.
Bugungi kunda 37 yoshda bo'lgan Sandro Sherer o'z vaqtida futbolchi sifatida ham faoliyat yuritgan. U o'zining o'tmishini eslar ekan, maydonda juda og'ir xarakterli va tartibsiz o'yinchi bo'lganini tan oladi.
Hakamning so'zlariga ko'ra, u yoshligida haqiqiy isyonkor bo'lgan va bu uning hozirgi qat'iy hakamlik uslubiga ta'sir qilgan bo'lishi mumkin.
“Zamin”ni Telegramʻda oʻqing!
