AMD korporativ ish stansiyalari uchun yangi Ryzen PRO 9000 protsessorlarini taqdim etdi

AMD kompaniyasi o‘zining Ryzen PRO 9000 turkumini oltita yangi protsessor modeli bilan kengaytirdi. Ushbu yangi mahsulotlar oddiy foydalanuvchilar uchun emas, balki asosan korporativ sektor va yuqori unumdorlikka ega ish stansiyalari uchun mo‘ljallangan. Bu haqda Ixbt.com xabar beradi.

Seriyaning eng kuchli vakili Ryzen 9 PRO 9965X3D bo‘lib, u 16 yadro va 32 oqimga ega. Protsessor 4,3 GGs bazaviy va 5,5 GGs maksimal chastotada ishlaydi. 128 MB L3-kesh xotirasi bilan jihozlangan ushbu model o‘yinlar va og‘ir hisoblash jarayonlari uchun yuqori samaradorlikni ta’minlaydi.

Shuningdek, 8 yadroli Ryzen 7 PRO 9755X3D modeli ham taqdim etildi. U 5,2 GGs chastota va 96 MB L3-kesh xotirasiga ega bo‘lib, o‘zining texnik ko‘rsatkichlari bo‘yicha mashhur Ryzen 7 9800X3D modeliga juda yaqin turadi.

AMD ushbu X3D modellaridan tashqari, Ryzen 9 PRO 9955, Ryzen 9 PRO 9965, Ryzen 7 PRO 9755 va Ryzen 5 PRO 9655 kabi yana to‘rtta protsessorni namoyish qildi. Ushbu modellar 6 tadan 16 tagacha yadro soniga ega bo‘lib, 120–170 W TDP darajasida ishlaydi.

Abror Shuhratov

«ZAMIN.UZ» muharriri

+ Zamin.uz saytini Google'ga qo'shing