Hindistonda kuchli bo‘ron va shamol oqibatida g‘ayrioddiy va xavfli holat yuz berdi. Voqea 14 may kuni Bamiyana qishlog‘ida sodir bo‘lgan bo‘lib, unda Nanhe Miyan ismli erkak kuchli shamol sabab jarohat oldi.
Ma’lumotlarga ko‘ra, bo‘ron paytida erkak uyining tunuka tomini ushlab turishga harakat qilgan. Shu paytda kuchli shamol tomni ko‘tarib, u bilan birga erkakni ham taxminan 30–50 fut balandlikka olib chiqqan.
Oradan qisqa vaqt o‘tib, u yerga qulagan va qo‘l-oyoqlaridan jarohat olgan. Shunga qaramay, shifokorlar uning hayoti xavf ostida emasligini va omon qolganini tasdiqlashgan.
Voqea guvohlari bu holatni telefon kamerasi orqali tasvirga olib, internetga joylashgan. Video tez orada ijtimoiy tarmoqlarda keng tarqalib, foydalanuvchilar orasida katta muhokamalarga sabab bo‘lgan.
Mutaxassislar bunday kuchli shamol va bo‘ron paytida ochiq joyda qolish yoki tom ustida ishlash juda xavfli ekanini yana bir bor eslatishmoqda.
“Zamin”ni Telegramʻda oʻqing!
