BMW kompaniyasi 2028-yilda 1 Series modelining yangi, to'rtinchi avlodini taqdim etishni rejalashtirmoqda. Yangi avtomobil ham elektromobil, ham gibrid dvigatel variantlarida ishlab chiqariladi. Kompaniya ushbu model orqali Yevropa bozoridagi yosh xaridorlar e'tiborini qozonishni maqsad qilgan. Bu haqda Autocar.co.uk xabar beradi.
BMW kompaniyasining ixcham avtomobillar dizayni bo'yicha rahbari Oliver Heilmerning ta'kidlashicha, 1 Series brendning asosiy tayanchlaridan biri hisoblanadi. Yangi model Neue Klasse dizayn falsafasiga asoslanadi va Mercedes A-Class hamda Audi A2 E-tron kabi raqobatchilarga qarshi kurashish uchun mo'ljallangan.
Garchi ko'plab ishlab chiqaruvchilar daromadliroq bo'lgan krossover va SUV segmentlariga e'tibor qaratayotgan bo'lsa-da, BMW 1 Series xatchbekini o'z qatorida saqlab qolish muhim deb hisoblaydi. O'tgan yili ushbu model dunyo bo'ylab 200 mingga yaqin nusxada sotilgan.
Yangi 1 Series o'zining an'anaviy xatchbek shaklini saqlab qoladi, ammo tashqi ko'rinishi iX3 va i3 modellarida ko'rilgan Neue Klasse uslubida qayta ishlanadi. Bu yondashuv har bir modelga o'ziga xos xarakter berishga va mijozlarni brendga yoshligidan jalb qilishga xizmat qiladi.
“Zamin”ni Telegramʻda oʻqing!
