29-ноябр куни Наманган вилояти Чуст туманида қаттиқ маиший чиқиндиларни қайта ишлаш ва улардан электр энергияси ишлаб чиқарувчи заводнинг тамал тоши қўйилди. Ушбу лойиҳа Хитойнинг экологик компанияси China Everbright International томонидан амалга оширилади.
Лойиҳанинг умумий қиймати 141,5 миллион АҚШ долларини ташкил этади. Завод кунига 1,5 минг тоннагача чиқиндини қайта ишлашга ва йилига 227,5 миллион кВт·соат электр энергияси ишлаб чиқаришга қодир бўлади.
Лойиҳанинг амалга оширилиши доирасида 150-200 та иш ўрни яратилади. Заводни 2027-йилда ишга тушириш режалаштирилган.
Ишлаб чиқарилган электр энергия давлатга 30 йил давомида кафолатли шартнома асосида сотилади. Қурилиш ишлари Ўзбекистоннинг тўққизта ҳудудида чиқиндиларни термик қайта ишлашга ихтисослашган мажмуалар қуриш дастури доирасида олиб борилмоқда.
Жорий йилда Андижон, Самарқанд ва Фарғона вилоятларида ҳам шу каби заводлар қурилиши бошланди.
Меҳмон гуруҳидаги фойдаланувчилар ушбу мақолага изоҳ қолдира олмайди.
