2025 йилнинг январ–сентябр ойлари якунига кўра, Ўзбекистон туризм соҳасида ўсиш суръати бўйича жаҳон рейтингида еттинчи поғонани эгаллади. Бу ҳақда Туризм қўмитаси World Tourism Barometer халқаро ҳисоботига таяниб маълум қилди. Кўрсаткичлар мамлакат учун нафақат қувонарли, балки стратегик жиҳатдан ҳам муҳим натижа сифатида баҳоланмоқда.
Маълумотларга кўра, республикага ташриф буюрган хорижий сайёҳлар сони пандемиягача бўлган 2019 йилги даражадан 73 фоизга юқори бўлган. Бу Ўзбекистоннинг глобал туристик бозордаги мавқеи тикланибгина қолмай, янги босқичга кўтарилганини кўрсатади. Шу билан бирга, туризм оқимини тиклаш суръати бўйича мамлакат Европада иккинчи ўринни эгаллаб, 2024 йилга нисбатан 13 фоизлик ўсиш билан минтақанинг энг жозибали тўрт йўналишидан бири сифатида эътироф этилди.
2025 йил Ўзбекистон туризми учун ички рекордлар йили ҳам бўлди. Йилнинг 11 ойи мобайнида мамлакатга 10,7 миллиондан ортиқ хорижий меҳмон ташриф буюрди. Айниқса, апрел ойидан бошлаб ҳар ойлик туристлар оқими барқарор равишда 1 миллион кишидан ошиб бориши соҳа учун янги тенденция шаклланаётганини англатади.
Туризм хизматлари экспорти ҳам сезиларли даражада ўсди ва 4,4 миллиард доллардан ошди. Мутахассислар бу натижани визасиз режимнинг кенгайтирилиши, авиа ва темирйўл қатновларининг кўпайиши, шунингдек, Ўзбекистоннинг халқаро майдонда фаол тарғиб қилиниши билан боғламоқда.
Анъанавий туристик марказлар — Самарқанд, Бухоро ва Хива ҳамон асосий қизиқиш нуқталари бўлиб қолмоқда. Бироқ сўнгги пайтларда экологик, гастрономик ва минтақавий туризм йўналишларига бўлган талаб ҳам кескин ортмоқда. Айниқса, узоқ хорижий давлатлардан келаётган сайёҳлар улушининг ўсиши Ўзбекистоннинг дунё харитасидаги туристик жозибадорлиги мустаҳкамланаётганидан далолат беради.
Қисқаси, 2025 йил натижалари Ўзбекистон туризми учун янги имкониятлар эшигини очиб, мамлакатни жаҳон миқёсидаги етакчи йўналишлар сари яна бир қадам яқинлаштирди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
