“Ўзавтосаноат” 2015 йилда умумий қиймати 381,5 млн долларлик лойиҳаларни амалга оширишни бошлайди » Ўзбекистон янгиликлари – Zamin.uz
16-04-2015 | 21:03 ZAMIN.UZ / Авто / 16 Апрел 2015 года
1 508

“Ўзавтосаноат” 2015 йилда умумий қиймати 381,5 млн долларлик лойиҳаларни амалга оширишни бошлайди

“Ўзавтосаноат” 2015 йилда умумий қиймати 381,5 млн долларлик лойиҳаларни амалга оширишни бошлайди

Таркибига Ўзбекистон автомобилсозлик соҳасида фаолият юритувчи корхоналар кирадиган “Ўзавтосаноат ” АК 2015 йилда умумий қиймати 381,5 млн долларни ташкил қиладиган лойиҳаларни амалга оширишни бошлайди. Бу ҳақда компаниянинг дастурида айтиб ўтилган.

Ўзбекистон Республикаси Президенти Ислом Каримов қарори билан тасдиқланган ушбу дастур юртимиз автомобилсозлик соҳаси корхоналарининг ишлаб чиқариш тизимини модернизация қилиш, техник ва технологик янгилаш бўйича 15 та лойиҳани ўз ичига олади. Бунинг учун йўналтириладиган маблағлардан 254,3 млн доллари тижорат банклари, 135,9 млн доллари корхоналарнинг шахсий маблағлари ҳисобига тўғри келади.

Хусусан, GM Uzbekistan компанияси 2015-2016 йилларда T250 платформаси негизида (Chevrolet Aveo) автомобилларни серияли тарзда ишлаб чиқаришни ташкил этиш учун 104,2 млн доллар сармоя ажратади. Бу ишлаб чиқариш қуввати йилига 73,6 минг дона автомобилни ташкил қилади. “Ўзавтосаноат”, шунингдек, янги модель учун бутловчи қисмлар ишлаб чиқариш учун мавжуд ишлаб чиқариш қувватларини модернизация қилиш учун 53,8 млн доллар сармоя ажратади.

Жорий йилда Gentra седанини йиғишни маҳаллийлаштириш бўйича 18,4 млн долларлик лойиҳани амалга ошириш бошланади. Лойиҳа штам-пайвандлаш деталларини ишлаб чиқариш асбоб-ускуналарини ишлаб чиқишни кўзда тутади. Бошқа енгил автомобиль моделларини маҳаллийлаштириш учун алюмин деталларни ишлаб чиқариш жараёнига икки йил ичида 38 млн долллар сармоя киритилади. Ишлаб чиқариш қуввати йилига 3,2 млн дона маҳсулотни ташкил қилади.

“Ўзавтосаноат” АК Самарқанд вилоятидаги MAN Auto-Uzbekistan Ўзбекистон-Германия қўшма корхонаси ишлаб чиқариш жараёнини маҳаллийлаштириш учун 30 млн доллар ажратади. Қўшма корхона негизида кабиналарни ишлаб чиқаришни ўзлаштириш лойиҳаси 16 млн доллар сармоя киритиш ҳамда йилига 3 минг дона маҳсулот ишлаб чиқаришни кўзда тутади.

Бугунги кунда Ўзбекистон автомобилсозлик саноатига киритилган сармоялар ҳажми 2 млрд долларни ташкил қилмоқда. “Ўзавтосаноат” АК 2004 йилда “Ўзавтосаноат” уюшмаси негизида ташкил этилган. Компания таркибига 20 дан ортиқ корхоналар киради. Улардан енгил автомобиллар ишлаб чиқарувчи СП GM Uzbekistan қўшма корхонаси ҳамда автобус ва юк машиналари ишлаб чиқарувчи “Самарқанд автомобиль заводи” МЧЖ энг йириклари ҳисобланади.

Манба: www.kun.uz

Бизни Телеграм орқали кузатиб боринг: https://telegram.me/zaminuz

Рейтинг:
  • Dislike
  • 0
  • Like
Ҳавола:
Рейтинг@Mail.ru