Галлуп томонидан ўтказилган янги сўровнома АҚШда маълумотлар марказлари (дата-сентер) қурилишига нисбатан норозилик кескин ошганини кўрсатди. Ҳозирда америкаликларнинг 70 фоизи бундай объектларнинг ўз уйлари яқинида жойлашишига қарши. Таққослаш учун, аввалги сўровларда бу кўрсаткич 47 фоизни ташкил этган эди. Тҳе Вашингтон Пост нашрининг ёзишича, аҳоли ҳатто атом электр станцияси билан қўшни бўлишни йирик маълумотлар марказидан кўра афзалроқ кўрмоқда. Бу ҳақда Ixbt.com хабар беради.
Сунъий интеллект технологияларининг жадал ривожланиши маълумотлар марказларига бўлган талабни ошириб юборди, бу эса бутун мамлакат бўйлаб ижтимоий низоларни келтириб чиқармоқда. АҚШнинг 69 та юрисдикциясида аллақачон бундай иншоотлар қурилишига чекловлар ёки мораторийлар жорий этилган. Жамоатчилик норозилиги ва сиёсий босим туфайли кўплаб лойиҳалар тўхтаб қолмоқда.
Норозиликнинг асосий сабабларидан бири электр энергияси тармоқларига тушаётган юкламанинг ортиши ва бунинг оқибатида электр тўловларининг қимматлашувидир. Айрим ҳудудларда инфратузилманинг кенгайиши фонида нархлар 267 фоизгача кўтарилган. Шунингдек, аҳоли шовқин, сув ресурсларининг ҳаддан ташқари кўп сарфланиши ва экологик оқибатлардан хавотирда.
Ушбу вазият бутун сунъий интеллект саноати учун жиддий муаммога айланмоқда. Лойиҳаларни келишиш муддатлари чўзилмоқда ва рухсатнома олиш жараёни мураккаблашмоқда. АҚШ ҳукумати йирик технология компанияларини инфратузилмани ривожлантиришни ўз маблағлари ҳисобидан молиялаштиришга чақирган бўлса-да, ҳозирча вазиятда сезиларли ўзгаришлар кузатилмади.
“Zamin”ни Telegram'да ўқинг!
