Axion: Дизелда учувчи биринчи шахсий дрон намойиш этилди

Американинг FusionFlight компанияси томонидан дизель ёқилғисида ишлайдиган илк шахсий учувчи — Axion дронига ойдинлик берилди. У нафақат футуристик дизайни, балки пойдеворидан тортиб функциясигача — замонавий авиациянинг янги босқичини бошламоқда, деб ёзмоқда Kursiv.media сайти.

Компания 2019 йилда илк AB5 JetQuad моделини яратган эди. Кейинроқ, ундан илҳомланиб, AB6 JetQuad дрони ва энди — Axion учиш қурилмаси дунёга келди. У электр моторлар ўрнига микротурбинали реактив двигателлардан фойдаланади. Эътиборли жиҳати — ушбу моторлар дизел, керосин ёки авиацион ёқилғида ишлайди.

Axion — ўлчами кичик автомобилга тенг бўлган шахсий ҳаво транспорти. Унинг энг юқори парвоз вазни 230 кгни ташкил этади:

- қурилманинг тоза оғирлиги – 70 кг,
- ёнилғи – 80 кг,
- фойдаланувчи ёки юк – 80 кг.

Дрон 8 та реактив двигател билан жиҳозланган бўлиб, улар жами 1097 Нгача тортиш кучини беради. Бу Axionга вертикал кўтарилиш, ҳавода “муаллақ туриш” ва 362 км/соатгача бўлган тезликда ҳаракатланиш имконини беради. Энг юқори парвоз баландлиги 10 км, максимал парвоз вақти — 15 дақиқа.

Қурилмада хавфсизликка ҳам жиддий эътибор қаратилган. Ҳатто битта двигател ишдан чиқса ҳам, қолганлари билан муваффақиятли қўнишни таъминлаш мумкин.

Axion икки хил бошқарув режимида ишлайди:

1. қўлбола — иккита джойстик орқали;
2. автоном — сенсорли экранда манзил танланади ва қурилма ўзи ҳаракатланади.

Айнан шу автоном режимда Axion фавқулодда ҳолатларда беморлар ёки муҳим юкларни тез етказиб беришда қўлланилиши мумкин.

FusionFlight асосчиси Алекс Тайцнинг таъкидлашича, қурилманинг ердаги синовлари бошланган ва 2025 йил охиригача илк ҳаво синови ўтказилиши режалаштирилган. Axion буюртма асосида ишлаб чиқарилади. Унинг бошланғич нархи — $290 минг.

Бу янгилик — фақатгина технология мухлислари учун эмас, балки келажакда шахсий авиатранспорт тушунчасини қайта шакллантирувчи қадам бўлиши мумкин.
«Замин»ни Telegram’да ўқинг!